Dziyń Bajtla

Bezmałaś momy w Polsce polityka prorodzinno i nasze władze ogromnie dbajom ło to, żeby przirost naturalny boł dodatni.  Jakoś tego nie widza, ale mono mie sie tak yno zdo.

Czy bajtli momy wiyncyj, czy myni? Podle łostatnich lot, to troszka ruszyło, ale myśla, że skuli tego, że mnoży sie wyż demograficzny, czyli pokolyni  rodym z końca komuny. W przedszkolach miejsc brakuje, ale jak tak człowiek se poształnuje czamu, to rozwiązani je proste.

Jeszcze 30 lot tymu 30% bajtli łaziyło do przedszkoli, reszta yno do zerowki. Dzisio praje 90% bajtli łazi do przedszkola, bo ojce oba robiom, a babcie do odmiany tyż jeszcze robiom. Yno z tymi wolnymi placami we przedszkolach je problym. Bo jich ni ma. I kaj ta polityka prorodzinno?

Ale nie ło tym chca kludzić. Bo dziyń bajtla i same bajtle to je coś pięknego. Bajtle to radość i ciynżko żeby ś nimi sie mierzło. Zawsze trza być w pelnej gotowości bojowej, trza mieć siyła na wygupy i roztomańte graczki.

Wtoś kiedyś padoł: „jak mosz bajtla, to ni mosz czasu sie starzeć”. I coś w tym je. Bo bajtle dowajom, jak to sie terozki godo „pałera”. I choć człowiek nie roz wyloz by z siebie i stanoł wele, to wartko wszysko człowiekowi przechodzi. Bo bajtle to radość, to nasze odbici, kiere chcemy widzieć jeszcze lepsze niż samych siebie we żdżadle.

Wykuskujcie swoji bajtle, zrobcie jim dobry maszket, bo przeca majom świynto yno roz w roku. Pyrsk

Żdżadło - lustro

Kludzić - opowiedzieć

Graczki - zabawy, zabawki