Produkty tradycyjne

Wiycie boł żech łoto na Jarmarku Produktow Tradycyjnych we Chorzowie i tak mie jakoś wziono na rozważowani. Dużo sie terozki godo o produktach tradycyjnych, ale czy rychtyk łone som tradycyjne?

Wiycie roztomańcie to bywo. Cygonow, kierzi udowajom, że majom te produkty regionalne je w pierony. Wszysko nazywo się łod babcie, yno omy brakuje. Nojlepszy jak człowiek zacznie sie dopytywać, toż wtedy sie zaczyno. Oscypki cyganione- bo z krowskigo mlyka, chiński ryby, kiere bezmałaś były chytane we Bałtyku, abo coś z ekologicznej uprawy, kole autobany. I szło by tak jeszcze wymiyniać i wymiyniać.

A czamu tak je, bo podle mie te wszyski certyfikaty, to je pic na woda. Dowosz kasa, a my ciebie certyfikat jakości. Czy nie lepszy by było, keby ludzie umieli, tak jak to je zagranicom sprzedować, to co se wyprodukujom. Wiadomo, że nic na lewo. No ale u nos zarozki tak dowalom podatkami, że tyn co produkuje, bydzie mioł skorka za wyprawka. I co z tym fantym zrobić?

Jak o mie idzie, to kożdy rolnik musioł by mieć prawo sprzedać, to co wyprodukuje do sklepu i ni mieć z tego żodnych problymow. Wtedy byłoby tak jak trza, do porządku i kożdy by boł zadowolony. I klijynt- bo dostoł by dobry towor i rolnik, kiery mioł by zbyt.

A jak idzie ło te produkty tradycyjne, toż dobrze, że w końcu skapli my sie i zaczynomy szanować nasze dziedzictwo kulturowe (jak to sie terozki nazywo). Yno jeszcze keby te produkty były co we wercie. Pyrsk!

Chytane - łowione

Pic na woda - bubel

We wercie - miały jakąś wartość