Bez lato yno placki

Lato momy w pełni, pogoda piykno, a jo wom chca połosprowiać o nojlepszym letnim kuście. Kożdy przeca mi przitaknie, że w taki chyc, to bardzo człowieka na zołzy i inksze ciynżki miynsiwa nie ciongnie, ale placki dycki rod.

Ale to tyż przeca momy skiż tego, że nasze omy przeca kombinowały łobiady z tego co miały. Wlazowały do zegrodki czy na pole i tam dziypiyro wiedziały, co bydom ważić. A że zimiokow dycki je moc, toż na łobiod dziynnie były.

Jednak bez lato placki som nojlepsze, bo też zimioki jeszcze majom dużo wody i wtedy nie szmakujom jak treciny. Taki placek przeca idze rychtować podle roztomańtych receptow, bo i z kiszkom, z grzibami.

Terozki to idzie nikandzi pokosztować plackow z gulaszami kiere szumnie mianuje się „po wyngiersku”, kotleta w placku, czy jeszcze inkszych wariacji.

Mie zaś fest tyż szkmakujom taki staromodne placki, na kiere się godo chlastoki, skiż tego że się nimi chlaszcze na blacha. Surowe ciasto się wylywo na nagrzoto blacha z pieca i już, a potym yno zwyrtnyć. Przi tych plackach musicie pamiyntać, że blacha musi być lekko przelecano skorom z wyndzonki, bo placek się nie śmi przichycić.

Taki placki rychtowały nojczynści nasze starki, bo i blacha kożdy w doma mioł, a do plackow nie cza było oleju. Potym yno jich pomaściyły i fertig.

Kochani Ludkowie wracejmy do prostego, naszego jodła, bo łone je nojlepsze.

A jak żech wom rychtyk fest narobioł szmaku na te placki, a czyć się wom nie chce, toż możecie dycki do mie na gotowe do szynku (terozki się mianuje restauracjom) prziś. Smacznego, pyrsk!

Kiszka - kwaśne mleko

chlastoki - placki z blachy

zwyrtnyć - obrucić