Turystyczno tułaczka

Momy lipiyń i piykno pogoda, beztoż trza z tego korzystać i kaś wybznyć. Jo też tak pomyśloł i fechtli my sie z mojom ślubnom i bajtlym na wywczasy. Wiycie roz do roku trza dychnyć, a i somsiadom cza pokozać, że biydy nie klepiymy. Ale tak po prowdzie, to trza choć na pora dni kaś porajzować  i podychać świyżym luftym.

Jo stwierdzioł, że trza być patriotom i wybrali my sie z mojom nad nasze polski morze, choć roztomańcie to ś nim bywo. Bo jak je piyknie,  toż podle mie, ni ma lepszych wywczasow i plaż. Ale jak durch kidze toż człowiek roz dwa mo dość. Ale nie ło tym chca kludzić. Yno o tej tułaczce kiero my mieli, żeby sie tam dostać.

Jechali my dłokszy niż do Chorwacje, beztoż wcale mie nie dziwi, że Hanysy rade tam jeżdżom. Drogi rozkopane na amyn i choć podgoniyli my na autobanach, roz dwa my to straciyli w korkach i objazdach. Nie spomna już o dziurskach, po kierych trza jeździć.

Jo z auta wyloz obaniały, chobych tydziyń jechoł.

I musza wom pedzieć, że już bych te wywczasy przezywoł i postawioł na wywczasy z fligrym. Ale jak ech pokosztowoł naszych dobrych ryb prosto ze morza, wciepnoł na ruszt gofra, zarozki mi wszysko przeszło. A do tego zawsze byda godoł, że nasze plaże som nojpykniejsze. A na koniec życza wom udanych wywczasow bez takij tułaczki. Pyrsk!

Lipiyń – lipiec

Wybznyć – pojechać

Fechtli my sie – pojechaliśmy

Luft – powietrze

Fliger – samolot