Jak dbosz tak Mosz

Pogoda piykno, ptoszki śpiywajom, no i som my już po wyborach do Europarlamyntu, choć bardzo my sie nie garnyli do tego głosowanio, bo ani ćwiercina s nas nie poszła na wybory. Ale jo myśla, że pomogła tymu i pogoda, ale też nastroje nos Polokow.

Ale nie o tym chca dzisio kludzić. Miołech łoto ta przijymność ważynio uzaś z bajtlami. I powiymm wom, że dycki łod nich coś erbna.

Bo i myślyni takigo bajtla je blank inksze, a przi tymu nie skrziwione cygaństwym. Bo bajtel tak jak jo, co myśli to powiy. I to mi sie podobo.

Ale musza wom pedzieć, że z tymi bajtlami to ni ma tak łaps. Bo przeca uczony

ś Nieba nie ślecioł, yno cza trocha przi tym sie nagimnastykować. Nojważniejsze, żeby bajtlom dużo łosprowiać, ale i pokazywać. Łone chytajom ańc mig.

Z bajtlym je jak z zegrodkom na wiosna, jak na czas nie oplejesz, to psinco potym zebieresz. Bo człowiek jak zielinka, łod poczontku musi być flyjgowano, kierowano. Godajom, że jak se pościelisz tak sie wyśpisz. I to je prawda. Jak z bajtlym dużo od poczontku działosz, toż potym to yno procyntuje.

A kożdy z nos chciołby za 20-30 lot być dumnym jak paw ze swojigo bajtla, że tak poradzioł go wychować. Bezto kochani Ludkowie, inwestujcie w swoji pociechy, ale z rozumym, żeby nie przeinwestować. Pyrsk!

ćwiercina - 1

bajtel - dziecko

ańc mig - w momencie

flyjgować - dbać, opiekować się