Letni Kust

Musza Wom pedzieć, że lato to je taki piykny czas, bo i na dworze ciepło, nie cza hajcować (chocioż nikiedy cza zawyndzić w piecu), a i warzyni je proste.

Nie cza kombinować specjalnie, bo kaj człowiek niy zajrzy tam cosik do warzywnio je. A jeszcze jak tak mo kiery zagroda z grincojgiym i kaj jako gymiza tam mo, toż warzyni to je bajka. Człowiek yno idzie z miskom i wytarguje co mu cza.

Dzisio godajom ludzie, że życi je drogi. Ale my sami se to robimy. Przeca idzie prziszporować na kuście, choby bez tako zegrodka, kaj wszysko co poczebne do warzywnio momy.

Moja starka też dycki godajom, że lotać z kajsterkom do sklepu po kaj jako rzecz to je i gańba i ciągnie po kapsie. A pamiyntejcie, że człowiek nigdy nie wycyrkluje z tym wiela czego mo kupić i dużo jodła sie marnuje, a to już je grzych.

A niy lepszy se urwać z zegrodki tela wiela cza i uwarzić dobro zupa abo inszo rzecz.

Bez lato to sie jy zupa z oberiby, botwinki, kartloflonka z młodych zimiokow. A jak je hyc, toż nojlpeszy se zrobić jajco sadzone, zimioki, szałot z zalewkom octowom maszczony szpyrkami, abo sznitbony polote masłym z bułkom tartom. A na karminadle z blumkola czekom cołki rok. Kiery nie lubi bez lato mizerie, kiero nojlepszy pasuje do kotleta i to z kościom? Do obiadu dycki musi też być kompot, czy to ze świyntojanek, wieprzkow, pozimkow abo malin. Ku kawie musi być zista z rabarberym, a na wieczerzo nojlepsze som tomaty z cebulom. I jak tu nie przoć letnimu Kustowi?

Jo wom powiym yno tela, że jak człowiek obrotny to prziszporuje na kuście, a starzi ludzie godajom, że „komu sie nie lyni, tymu sie zielyni”. Pyrsk!

Hajcować - palić w piecu

Sznitbony - fasolka szparagowa

Świyntojanki - czerwona porzeczka (odmiana czerwcowa)

Blumkol - kalafior

Zista - babka (ciasto)

Oberiba- kalarepa