Zowistne ludziska

Witom Wos piyknie. Ani sie człowiek nie obejrzoł, a już uzaś momy nowy tydziyń. Tyn czas leci jak szust, a co rok, to mi sie zdo, że wartszy. A to wszysko skuli naszego podziczałego zaganianio. Bez te zaganiani, nikierzi durch sie potracili, bo locom  jak kot z pacharzinom, żeby yno przysłowiowo „kasa” pasowała.

Nejgorsze do mie je to, że ludziska som ogromnie zowistni. Nie dej Boże żeby komuś lepszy sie kulało. Koniec. Som my narodym, kiery nie życzy niczego – bo kaj też, żeby mioł nasz somsiod nowo wystawiono chałupa a my niy, lepsze auto prosto z salonu, a my starego harczka, kiery co rusz sie psuje. Kaj by też, żeby wtoś mioł lepszy płot niż my, abo jeździoł na wywczasy 3 razy do roku. Zarozki sie godo o nim – że kaś musi kraść. Nie godom już o babach, kiere zowiszczom nojbardzi – bo przeca koleżanka z roboty nie śmi bydź chudszo, ani mieć bardzi przystojnego chopa. Zarozki godajom, że na pewno, on mo jako na boku.

A mie dycki starka godali – życz a bydzie ci życzone. Powiym Wom, że starom sie ta prosto zasada w moim życiu stosować i chocioż mi wątroba nie gnije. Bo godajom, że od zowiszczynio to yno zymby sie psujom i wątroba gnije. Ci co zowiszczom, to se yno sami siebie ubliżajom. A na co to komu?

Godajom, że jak dobrze życzysz, to wroci ci sie to dwa razy. Weźcie se to do serca i nie zowiśćcie inszym ludziom, bo przeca w życiu yno o to niy idzie. Pyrsk!

Zowiścić – zazdrościć

Mieć na boku – zdradzać

Ubliżać se – robić sobie krzywdę

Zaganiać – tworzyć majątek