Z jakim przistajesz takim się stajesz

Koniec września to tak dycko bywo czas na zaprawiani owocow. Kisi się ogorki, smaży powidła, bo co swoji to swoji. Tak my już do tego prziwykli, że choć dżymy i powidła idzie se kupić my (jak długo pójdzie) dali zaprawiomy. Nie wiym, czy to tak wszyjscy porozumiom te moji downe nazwy kiere opisuja, ale dyć niech chocioż moji rownioczki pośmiejom.

 

Miałach inkszy tymat, bo w tym miesioncu zdarzo się moc roztomańtości. Już nie godom o „skrotach myślowych”, bo do nieporozumiyń już my prziwykli. Som też jednak ludzie wykształcyni, że widzom i słyszom, że ni ma dobrze ale... wyjyżdżać nie chcom. Majom nadzieja, że kiejś mogom się przidać. Choć mondrym, doświadczonym w sprawie „wykopuje się stołki” sodzo inkszych, żeby za chwila ich „wychopsać” to my już się też przizwyczajyli i nikiere nazwiska zapominomy. Młodzi trocha ze strachym zaczynajom nauka. Tym rozważniejszym brakuje czasu na rozrywki, jeśli rozum wytrzimie matura zdajom (bez amnestie). To co dobrego stało się z tom amnestiom to yno to, że poważniejsze instytuty majom już komplet a ulgowe matury abo czakajom na prziszły rok a absolwynci „amnestiowani” pracujom i dokształcajom się, żeby z czystom maturom dostać się na obrany kierunek. No bo rektorzi wyższych uczelni ni mogom pozwolić na degradowani instytutu a tym samym siebie! Jak już o młodzieży to trza jom „podzielić” na dwie zorty. Takich, co uczonc się chcom być ludziami przidatnymi i tych co nie wiedzom kim som i czym bydom. To co się dzieje widzimy. Taki piykny kraj, jakim jest nasza Polska, jest bez ustanku upokorzono. Roz przez młodego Poloka, co to w cudzym kraju zabijo rowieśnika, po to żeby reszta życio przeżyć w lochu. Drugi zabijo z miyłości. Czamu tak czynsto młodzi noszom przi sobie narzyńdzi zbrodni, czy to som od poczontku bandziory?

 

Jak przez gupota nie zabijom w szalonej jeździe swoich kompli, to go za marny grosz czy sprzynt „zasztyletujom” (bo to tak teraz ku wiynkszej sromocie opisujom) A ludzie starsi, ciyngiym we strachu, bo bandzior zamiast pomoc staruszce niyść siatka z towarym wyrwie ji taszka z ostatnim groszym. Komputery, kiere majom służyć ku pożytkowi uczom smarkatych przemocy. Bo gdo nauczył 7-latka pobić wystraszonego łebka w szkole (bo to jest taki zwyczaj). W dzisiejszych czasach przestały pasować downe przisłowia: „Jaki drzewo, taki klin, jaki ojciec taki syn”, bo dużo chacharow pochodzi z dobrych familiji, ale jak pracujoncy rodzice nie prziwachujom i taki smarkaty dostanie się do bandy, to go jest biyda wyrwać i uporzondkować. W koszyku blisko leżały dwa jabka. Jedne piykne, wielki a drugi też wielki ale zgnite te przilepiyło się do zdrowego i co... też zaczło gnić. I tu pasuje przisłowi: „Z jakim przistajesz takim się stajesz”. „Taki dorastajonce dziołchy tez majom nikiedy swoji zawyższone zdani o sobie. I też przisłowi:” „Jako matka tako natka” nikiedy nie pasuje. Bo matka prosi, radzi a one swoji. Ale jak se co nagrabiom, że nie idzie usnyć, to mama jest dobro. Możno to i dobrze, że pisani gwarom ciynżko się młodym czyto (i nie czytajom), bo by mie mogli serdecznie tym swoim slangym poczynstować. W moich szkolnych spotkaniach poznałach dużo mondrych młodych i jeśli tym moim pisaniym się obraziyli serdecznie przeproszom!

 

Ślonzoczka Aniela