Postne postanowienia

Dejcie se pozor na gripsko, kiere terozki wszyndzi panuje, bo mie latoś tyż tak wziono, żech leżoł tydziyń jak lacz. A to wszysko skuli tyj niewiadomo jakij pogody- roz słońce, roz mroz, wiatry, deszcze i żodyn nie wiy do końca co momy za pora roku. Wyglondo jak ku wiośnie, ale kiery to wiy, czy nie pudymy świyncić w zumiyntach ze śniegu, tak jak to było chyba ze 2 abo 3 lata tymu.

Ale nie o chorobskach chca dzisio połosprowiać, a bardzi ło czasie, kiery bydymy mieć, czyli Wielkim Poście. Latoś wyjątkowo wartko momy po karnawale, bo ani my sie łobejrzeli, a już faroż bydzie suł po czole popiołym. A to je oznaka jednego - Wielkigo Postu.

Dzisio ludzie bardzo, jak to sie terozki godo-„lajtowo” podchodzom do tymatu.

Zresztom nie jedyn pytany, co to je Wielki Post, odpowiy, że długi wpis w Internecie. Przeca terozki zamieszczo sie Posty, a nie wiadomości.

Ale dziynki Bogu jest jeszcze kupa ludzi, kierzi wiedzom, coż to je Wielki Post i chcom tyn czas jakoś spożytkować.

A podle mie, je to czas w kierym momy sie przirychtować na nojważniejsze świynto w naszej wierze, jakim je Zmartchwychwstani Pon Boczka.

To co w tym czasie robić?

To już kożdy musi podle siebie i swojigo sumiynio, se cosik obiecać. Jedni nie bydom jeś maszketow, inksi pić gorzołki, a jeszcze inksi jeś miynsa. Ale nojważniejsze, w tym wszyskim je to, żeby być trocha lepszym człowiekiym- nie przezywać, obgadywać, czy wyśmiywać. Jak se taki postanowiyni docie i w nim wytrzimiecie, to myśla, że Wielki Post bydzie udanym czasym. Pyrsk!

lacz - kapeć

suł- posypywał

zumiynta - zaspy