Wiela fabryka do

Wiycie momy czas wywczasow, beztoż jak kożdy rok wybroł ech sie z familijom. Latoś pojechali my zagranica, bo choć pogoda pewno, a i zawsze człowiek może łobejżeć se cosik inszego. I obejżoł żech- zabytki, jako ludzie też żyjom kaj indzi, no i jeszcze ludzko gupota. Pojechali my na opcjo all inclusive (znaczy wszysko w cynie), bo to sie w ciepłych krajach nojbardzi spłaci. Nie cza udować piyndzy na pici (a w hycu to sztyc suszy). Ale Polocy (zaroz godom, że dziynki Bogu nie wszyscy), troszka inakszy interpretujom all inclusive. Po mojimu- pij i jydz, wiela fabryka do, aż padniesz. I tak też to wyglondo- chołdy naladowane jedzynio na talyrzach, o piciu gorzoły nie spomna. Przeważnie jak widzicie kogoś ożartego przi basynie, to ni ma to Niymiec, Szwed, Anglik yno Rus abo Polok. Reklama se dycki umiymy zrobić jak trza. Do tego kożymy se puszczać głośno polski piosynki i som my królami imprezy. Tańce, śpiywy i przeciepnyte bryle na kicholu. Gorzołki to nikierzi se kożom wlywać poł szklanki, przeca opcja wszysko w cynie. Płaca i wymagom. Do mie, je to gańba na całego. Jo dycki powtarzom, że Polska to je piykny kraj, a Poloki som mądre, ale za taki reklamowani nos dziynkuja. Bo jo sie pod tym nie podpisuja. Powiym wom, że nikiedy aż sie gańba prziznać, że w Polsce som takie gupieloki. Bo potym inksi se myślom, że u nos to je norma i wszyscy tak robiom. Na koniec moji godki, życza wom udanego wypoczynku i promujcie nos we swiecie jako zaradnych i mądrych ludzi. Pyrsk!

Kichol - nos

Bryle - okulary

Hyc - upał

Gorzołka - wódka