Matki Boski Zielnej

W Polsce momy dużo roztomańtych świont, ale te 15 siyrpnia je jednym z piykniejszych.  Bo i świynto wojska polskigo, no i 15 tego fajrujymy tzw. Cud nad Wisłom z 1920 tego roku, jak nos Matka Bosko od Rusow uchroniła. Ale do mie to je przede wszyskim piykne świynto skiż tego, że świyncymy zielinki. Czyli Matki Boski Zielnej.

W tym dniu cza dycki zrobić cołki wiecheć z zielinek i iś do kościoła dać to poświyncić.

A bez zielinek ani rusz. Bo to one dowajom nom zdrowi i tzw. witalność. A podle mie medycyna naturalno je do nos nojlepszo, a nie truci się pilulkami, kiere na jedno pomogom, a na drugi nom zaszkodzom.

U naszych starek dycki roztomańte zielinki były w zegrodkach i to właśnie nimi sie lyczyło ludzi. A dycki coś tam komuś je. Przeca jak dziąsła puchnom, to nojlepszo je szałwia. Jak boli żołondek, toż yno kwownik, piołun, no i fefermynica.

Na opuchlizna i zapolyni, yno poczaskane liście biołej kapusty. A jak sie człowiek wnerwi, toż melisa jak znod.

I szło by tak wymiyniać kaj jako zorta zielinek, kiere służom nom ludziom, ale też i roztomańtej gadzinie. Bo kiery nie pamiynto, że pilyntom i kurzyntom, to yno kronżane pokrziwy. A przeca jak mo kiery rajmatyka, to cza yno wskoczyć do pokrziw.

O zielinkach mało sie godo i trocha my ło nich zapomnieli, a przeca to je samo zdrowi. Yno cza pamiyntać, że co za dużo, toż nie zdrowo. Zrobcie se pukiety i idzcie do kościoła, świyncić, to co dobre, nasze, polski. Pyrsk!

Zielinki – zioła
Fefermynica – mięta
Rajmatyka – reumatyzm
Pilulki – tabletki
Zorta – rodzaj