Żyć, nie chorować

Żodyn z nos nie chce chorować, ale nikiedy nie mogymy za to i cza sie wybrać do doktora. O polskim lycznictwie i służbie zdrowia lepszy niy pisać, bo może sie człowiek wnerwić. Tela kożdy miesionc biere sie nom z geltaku na ubezpieczynia, a jak człowiek musi skorzystać, toż i tak nojlepszy prywatnie (jak chcymy wyzdrowieć).

Ale mie bardzi idzie o doktorow. Jo wiym, że kożdy yno je człowiekiym i może mieć gorszy dziyń, ale co zaś to zaś. Przeca żodyn darmo nie robi, a ku tymu kaj ta przysiynga Hipokratesa. Kaj ta chynć pomoganio inszym. Coś tu u nos szwankuje.

Miołech niestety możliwość skorzystanio z dobrodziejstwa naszej służby zdrowio we niedziela. Godom niestety, boch yno się wnerwioł.

No ja, kto to widzioł chorować w niedziela? Mie sie dycki zdo, że po to som szpitale i doktory, żeby nom pomogać. Ale miołech inne wrażyni. Czekać dobro godzina, a potym ujrzeć mina znudzonego doktora, kiery średnio je przejynty pacjyntym. Coś tu mi nie gro! To je zawod kaj sie służy ludziom i nikiedy mały uśmiech, dobre słowo pomoże bardzi niż nie jedna pilulka.

Ale tu rodzi sie pytani, czamu tak je? A może żodyn specjalnie nie czuje kontroli nad sobom i godajonc potocznie, zwiso mu to i powiywo, czy pacjent bydzie zadowolony, czy niy.

A doktory som po to żeby lyczyć, ale przed wszyskim po mojimu po to, żeby ludziom pomogać.

Kajkolwiek na świecie tak właśnie je, i myśla, że w Polsce wcale o zarobki nie idzie (jo biydnego doktora niy znom), yno o mentalność. Cza chcieć ludziom kierym cosik je chcieć pomogać. Pyrsk, zdrowych wakacji!

Geltag - wypłata

Pilulka - tabletka

Yno - tylko

Nie mogymy za to - nie mamy wpływu