Noworoczno winszowaczka

Witom piyknie w tym Nowym Roczku 2013. Przeżyli my już „koniec świata”, Godni Świynta, Sylwester, no i Nowy Rok. Ale najważniejsze podle mie na początku kożdego roku je powinszować. I takom ślońskom winszowaczkom chca wos przywitać:

WINSZUJA JA WOM SZCZYNŚCIO, ZDROWIO,
BŁOGOSŁAWIYŃSTWA BOŻEGO ,
OD PANA BOGA MIŁEGO,
NA TYN NOWY ROK.
NA POWSZYSTKI LATA,
PÓKI ŻYĆ BYDZIECIE,
A PO ŚMIERCI KRÓLESTWO NIEBIESKI
(no i fuk do nieba).

Winszuja Wom yno zdrowio, bo godajom jak je zdrowi, to i człowiek szczynśliwy, a i piondze se zarobi.

Chca wom yno pedzieć, że w moji familiji do dzisiej momy piykno tradycjo winszowanio. Dycki w Nowy Rok chodzymy z winszowaniym, a na koniec trefiomy się u starki. No a potym do Trzech Kroli, kożdy chodzi do kożdego na tak zwano wrocka z noworocznym bezuchym. Moja starka jak winszuje dycki chodzi po wszystkich izbach w chałupie, skuli tego, żeby szczynści było wszyndzi i żodnego nie minyło.

Kochani Ludkowie, kaj te czasy jak my za bajtla lotali po chałupach i wszyskich ciotkach z winszowaniym. Na tyn dziyń czekało sie cołki rok. Bo i sie fest opłacało. Pamiyntom, że w Nowy Rok, kapsa była chrubo od piyndzy jak zrolowano fusekla z froty. Ale tak po prawdzie, to wcale nie szło o ta „kasa”, yno, żeby piyknie powinszować.

Beztoż jak yno znocie tako winszowaczka, nie gańbujcie sie i winszujcie. A wom Ludkowie jeszcze roz winszuja zdrowio i żebyście se w familijach pszoli i do kupy czimali. Pyrsk!

Słowniczek:

Pszoć- kochać

Winszować- składać życzenia

Fusekla- skarpeta

Gańbować sie- wstydzić

Wrocka- oddać coś

Do kupy- razem