Zdaniem Ślązoczki

Downij godali, że dobro baba musi mieć na czym siedzieć i czym dychać a baba bez brzucha to jak garniec bez ucha.

Momy coroz wiyncyj cieplejszych dni, wszystko budzi się do życio a wielkimi krokami zbliżo sie ku nom lato... Ludzie sie radujom i szykujom leki oblyczki. Nikierym te zeszłoroczne pasujom a inksi nie umiom się w nic wciść, bo trocha przibrali...

Kolorowe gazety, jedna bez drugo wrzeszczom jako ściepnyć te pozimowe kila. Ale jak tak słysza to ni ma wcale leki, bo zanim sie bydzie wyglondać tak jak kiejś trza sie trocha potropić. Jednym styknie silno wola a dlo inkszych to jest za mało, bo pokusa jest wiynkszo. Coroz wiyncyj widać ludzi w owerolach jak na śćmiywku ćwiczom ta swoja mocno wola. Som tacy, kierzi majom dość dopiyro po trzech kilometrach i tacy, kierzi ledwo wylecom z chałupy, bo som zadyszani i muszom sie wrocić nazod. Tacy majom inksze knify: warzom teje, lepiom flojstry, szykujom se jałowe papinki, kierych normalnie nigdy by nie zjedli, mażom maściami te mankamynta, a ci, kierych stać dajom se te fołdki wytnyć. Downij godali, ze dobro baba musi mieć na czym siedzieć i czym dychać a baba bez brzucha to jak garniec bez ucha. Dzisiej nie wszyscy się już z tym umiom zgodzić, bo rubynsowski kształty wychodzom z mody.

Trzabyło dać recht tym, co chcom trocha tego ciałka ściepnyć i dochtory godajom, że schrubszka szkodzi i jest najlepszom drogom do zawału - a jak jeszcze kurzom to już jest blank złe. Oprócz tego bolom kolana, krzyż, stawy piszczom a cholesterol szaleje. Najbardzij narażone som dzieci, kiere lubiom jeść roztomańte sztuczności: czipsy, bombony, i gazowane wody. W Anglii już nawet zakozali puszczać reklam bombonow miyndzy bajkami, bo jak dziecka, co dobrego ujrzom to zaroz muszom pomaszkiecić, bo to jest tak jak w tej pieśniczce:, „Gdy widze słodycze to kwicze a oczy mi świycom jak znicze i dobrze o tym wiysz ze połknył bych jak zwierz, co tylko chcesz.” Tymu całymu odchudzaniu to tak som trocha winne te chude manekiny na sklepowych wystawach. Oblyczki som piykne, yno, co z tego że na chuderlokow. W Hiszpanii już se z tym poradziyli - zakozali wystawiać takich chudych lalek, bo „lansowały niezdrowy tryb życia”. Ze szkoł wyciepli automaty z puszkami i paskudami a dziecka zachynco się do ćwiczynio na wuefie... bo czym skorupka za młodu, tym na starość...

Wszyscy radzom jak stracić, ale przidałoby się trocha rad jako nie przibrać. Najważniejszy jest umiar - we wszystkim - i w jedzyniu i w odchudzaniu - taki złoty środek. Tak trzabyłoby rzec: „Czego oczy nie widzom tego gymba nie zjy” i tego się trzimać.

Aniela Langer