To wcale ni ma leki fach

Zaczynajom coroz młodsi a konkuryncja coroz wiynkszo. Jak widza tych, „zbiyraczy” to zaroz mi stowo przed oczami obrozek chłopa kiery zbiyroł „suchy chleb dla konia”. Prawie z takom samom czynstotliwościom z jakom gospodorz przichodziył do filmowej Anule u nas zjawiajom sie chłopy z rozklekotanego Żuka. Ostatnio żech słyszała, (ale nie wiym czy to jest prowda), że Chiny potrzebujom stali na olimpiada i tyn nasz złom im sprzedujom. I tak by szło powiedzieć, że nasi złomiorze bydom mieli swój udział w historii...

Cało armia „dobrych ludzi” chce posprzontać nasz plac z niepotrzebnych hraści. Powiydzcie yno skond tyn złom brać?

Nikierzi se myślom, że sie leko zbogacom, nikerzi z biydy szukajom jakigoś zajyńcio, a dlo nikierych to jest tak zwano życiowo filozofia tak jak dlo bohaterow filmu „Edi”. Ostatnio w cynie som metale kolorowe, flaszki po „żytnij” i te plastikowe, kiere som innom dyscyplinom „zbiyractwa”. Do lamusa przeszła już makulatura masowo zbiyrano w szkołach a prziszły baterie.
Ostatnio mie zaskoczyło, że na tej złomiarskij nomenkalturze znajom sie już dzieci. Wiedzom wiela kosztuje kilo „surowego złomu” a wiela „alumn”- tako mało giełda-biznes jest biznes.

Jo tam nic do złomiorzy ni mom, bo chcom uczciwie zrobić pora groszy, ale ciarki przechodzom jak sie słyszy o niszczyrzach, dlo kierych ni ma żodnych świyntości. Chyba złyduchy posłały swoich zastympcow na kierchow. Z jakim żolym ogłoszali Ks. Dziekan ta wiadomość o złodziejstwie na cmyntarzu przi Pszowskij. Biydni ci ludzie kierzi ujrzeli zniszczony grob rodzicow. Tu nie idzie bronić, że od biydy kradnom. To som ludzie (możno smarkaci?) bez troszki honoru. A jak tak czytomy, że okradli kańś kościoł to zaś jest żol. Jednym sie „zapodobo” jakiś stary obroz inkszymy pozłacane aniołki, świyczniki, krucyfiksy, bo dlo złodzieja ni ma świyntości. Starka, godali, że takimu to trzabyłoby pazurska poucinać, żeby już wiyncyj takij sromoty nie zrobiył. Nikierych udo sie policji chycić, ale nikiedy już jest za nieskoro, bo abo udało sie to sprzedać na skupie abo „opylić” za granica.

Aniela Langer