Teczkom idzie zabić człowieka jak chudego koprucha

Na dworze coroz zimnij, coroz pryndzyj sie ćmi a czym dziyń krotszy tym bardzij się mierznie, wyczakuje sie wieczora coby obejrzeć „M jak miłość” a potym iść spać czakać aż nom przesztelujom czas.

 

Ale ostatnio zrobiyło sie trocha ciekawij, coś ruszyło. Ruszyły marsze, chocioż mie sie już od dłuższego czasu zdało, że tyn etap momy już za sobom. Ale ni! Moda prziszła nazod yno, że teraz z ludym maszerujom politycy a żeby nie leźli se w parada to każdy z nich musieli puścić inkszom drogom. A przeca walczom o to samo - o dobro Polski. Tak liczom „stary” elektorat, szukajom nowego, chwolom sie u kogo było wiyncyj a jedyn drugimu pokazuje kto tu mo łeb nie od parady.

 

Tyn nasz rzond roz sie rozchodzi, potym wszystko co było zabebłujom i schodzom sie nazod. Jest prowdom, że nie każdy tańcuje tak jak mu zagrajom co nikierzi chcom nowych wyborow.

 

Sztyjc wynochwiajom coś nowego. To Kaczyńscy szykowali zamach na Wałynsy to zaś znodli coś na Rokity w tym znanym szranku i skuli tego, że sie kiedyś przegrzeszył, bo ponoć inwigilowoł prawica chcom go wyciepnyć. Jedno jest pewne-Polska teczkami stoi. Słowo donos to jest rychtyk oszkliwy wyraz, ale jeszcze oszczymniejszy jest som fakt donoszynio. Jedyn mioł coś na drugigo, tyn coś padoł, tyn usłyszoł inkszy napisoł zanios komu trzeba dostoł paszport i kryptonim. Teraz jak otworzyli tyn oficerski szrank to zamiast mole wyfurgła yno ostuda a zgorszyni. A takom zwykłom papiorzannom teczkom idzie zabić człowieka jak chudego koprucha.

 

Ostatnio też zaczło sie larmo skyrz tego filmu, co go nagrała pani Rynata z posłami PiS-u, no i szło by powiedzieć, że „sprawa się rypła”. Oni zaproponowali tela, ona miała za mało i chciała wiyncyj. Sprawa próbujom zadeptać, godajom, że to ni ma żodno korupcja, że wszyjscy tak robiom, a jedyn spiker w telewizorze padoł, że dobrze, że nakrynciyli tyn film, bo przinajmnij wszyscy wiymy jak wyglondajom te poselski hotelowe izby.

 

Nie wiym czy żeście se dali pozor, że pani Begier oszczigała włosy. Ni ma już tego zocnego „złotego warkocza”. Godajom za to, że babki z krotkimi włosami som odważniejsze. No yno co bydzie jak sie oszczirze całkiym na krotko?...

 

Tak mi sie zdo, że nie szwankuje nom yno polityka zagraniczno. Nasi jeżdżom za granica, do nas przijyżdżajom. Niedowno przijechoł do Polski negocjować ruski dygnitarz. Piyrsze Rusy nasnochwiały problymow a teraz to chcom odkryncać. A dyć oni som dobrzi w zakryncaniu np. gazu a teraz chcom z nami ocieplać stosunki, a bez zeszło zima poł Europy marzła skyrz jejich manebrow.

 

Piyrsze chcieli puścić ruła z gazym pod Bałtykiym, potym sie obraziyli na nas, że my sie styrkali do „pomarańczowej rewolucje” a teraz sie obruszyli skuli tej amerykańskij tarcze antykrakietowej. Dostali strachu i prziszli to odkozać. Były minister od rolnictwa godoł, że mo szyroki horyzonty i on to załatwi, no ale załatwiyli go-nasi.

 

Wszystko to, co sie ostatnio dzieje przipomino taki stary rzymski tyjater, kaj walczyli gladiatorzi, a my som w tym tyjatrze widzami yno tak na prowda do końca nie wiadomo czy momy się tymu prziglondać i klaskać, czy kibicować czy normalnie wylyźć z tej imprezy...

 

Ślonzoczka Aniela