Ogólnie zaś chodzi o to żeby nie być idiotą

14 października przipadnie świynto Edukacji Narodowej i dziyń nauczyciela. Nikiedy tym biydnym rechtorom brakuje ciyrpliwości i siyły, bo wiela też idzie strzimać i chocioż mondrzi ludzie nawypisywali ksionżek o pedagogicznym wychowywaniu, to by tak trzabyło rzec, że w praktyce to mało dowo, bo ta teoria sie może mieć wyuczono a w praktyce i tak nauczycielowi kubeł na śmieci na głowa dajom i żodne reformy o patriotycznym wychowaniu uczniom tu nie pomogom, jak sie ich tego nie nauczyło w doma. Nauczyciele majom swoji przywary - szkolorze to już to pochytali, każdy mo jakiś przezwisko. Jednym uczniowie fest pszajom inkszym myni a do inkszych to sie ani nie zbliżajom bo sie ich bojom. Każdy na pewno pamiynto swoja piyrszo napisano w szkole litera, piyrsze przeczytane zdani, piyrszy dzwiynk zagrany na cymbałkach abo na flecie i kożdy pamiynto kto go tego nauczył. Prowdom jest, że rechtory były i som roztomańte, jedne jest pewne - chocioż majom inksze metody chcom jednego i tego samego, ale nie zawsze trefiom na dobry grunt, no bo jak wiadomo każdy uczyń „orze tak jak może”. Technika poszła do przodku i jedni się e-dukujom, inksi edukujom a jeszcze jedni dukajom, bo do głowy cinżko lezie a w tej całej edukacji to jest tak jak w pieśniszczce Rodowicz: „Ogólnie zaś chodzi o to żeby nie być idiotą”.

 

Jedyn uczony już padoł, że wiedza sama w sobie ni ma nic wert, na wartości przibiyro dopiyro wtedy jak jom użyjymy, bo świat nie płaci nom za to co wiymy ale za to co zrobiymy. I mioł recht.

 

Nikierzi sie też za bardzo tom naukom nie przelycajom a jak przidzie co do czego to sie spomino że w szkole to było ale mie tam nie było... no bo jedni uczniowie nim sie wakacje skończyły już tnom myjtermas i odliczajom do nastympnych....

 

Z tom edukacjom to było tak roztomańcie, przez całe stulecia istniynio cywilizacje człowiek szukoł nowych rozwionzań-po naszymu uczył się nowych rzeczy, piyrsze znod krzemiyń, potym wykopoł studnia, wybudowoł piramida, skonstruowoł fliger a potym rakieta i tak do końca nie wiadomo co to bydzie dali, bo świat idzie naprzodź...

 

We starych kronikach napisali, że wodzisławski szkolnicwo istniało już w średniowieczu, a poziom musioł być wysoki, kiej już wtedy wodzisławski dzieci jeżdziły pobiyrać nauki na Akadymii Krakowskij. Dlo ciekawości napisza, że wtedy rechtory za ta procno robota dostowali 10 talarow zboże, piwo, chlyb i drob...

 

Najważniejsze żeby nauczyciel mioł powołani do tego co robi, bo tak się czynsto zdo, że jednym rechrorom prziświyco taki zocne motto z ksionżki „Per Aspera Ad Astra”, dlo nikierych to rychtych jest utropa i mordynga i to fest po nich widać.

 

Nikiedy zaś jest tak, że nie pamiynto woł jak cielynciym był, bo dyć rechtory też kiedyś były szkolorzami, też nosiyły pukieltasza z heftami i kajetami i też wszystkigo na roz nie porozumieli, chodziyli na bule (bo nie wierza żeby nie chodziyli) nikiedy leserowali, bo sie im też nie chciało.

 

Dobry rechtor wiy jak dzieje się źle, umi pomoc jak uczyń se nie radzi, ale wiy też że nie każdy jest orłym i zostanie prymusym. Źle jest jak nauczyciele wyżywajom sie na boguducha winnych dzieckach, ale słusznie robiom jak ich „tympiom” za nieuctwo i niewyparzony jynzyk.

 

Ślonzoczka Aniela