Wybory równa się zwada i obrażani

Toż tak: To, co tak długo się szykuje, za chwila się stanie. Wybory! Pójdymy, tak jak to se przipominom hasło co było za niegdysiejszo Polska:” Silni, zwarci, gotowi”. Tak co prawie jest ech skołowano tom „ordynacjom wyborczom”, że tak co rychtych nie wiym o co chodzi? (jak to godoł pan Geremek). We słowniku też to tłumaczom, ale do mie jest to za fest uczonie. Wedle tego co czytom i oglondom wybory równa się zwada, ostuda, obrażani się, jednym słowym - gańba. No bo powiydzcie sami, co to się dzieje w tym sejmie jak radzom nad tom ordynacjom.

 

Nikiedy posłowie przipominajom baby co się kiedyś w kolejce do sklepu wadziyły. Gdo to widzioł, żeby marszałek musioł wysłuchować od posłów taki obraźliwe wyszkańty.

 

Przi rzondzoncych też roztomańcie, szastajom piniondzami jak szejkowie a dyć Polska ni ma zaś tako bogato.

 

Jako my jako Polska wyglondomy przed światym? W każdym ludzkim zbiorowisku (poczonwszy od familije) zdarzo się jakoś szarpaczka, ale dyć to idzie miyndzy sobom zabebłać. Jak se tak spomna wiela jo już wyborow przeżyła, ale nigdy ni miałach takich mankulij jak teraz. Było jasne jako głosować. Wszyńdzi było powypisywane na murach hasło: „3 x Tak Polaka znak” i kożdy wiedzioł kaj mo krziżyk postawić. Tak nom to przipomnieli w filmie „Sami Swoi”, Kargul kozoł napisać na chałupie „3 x Tak” a Pawlak „3 x Nie”, no i zaś haja!

 

Wtedy też były wybory, był sejm, senat, była „egzekutywa” yno zabrakło Rejtana, kiery by próbowoł to naprowda nakierować, sprzeciwić sie, tak jak kiejś chcioł zagrodzić droga rzondzoncym, co szli podpisać haniebny wyrok, choć to niewiela pomogło, bo go obeszli i tak podpisali. Tak se myślymy czy to bydzie lepszy po wyborach? Godo się, że każdo nowo mietła dobrze zamiato ale z czasym i ona przestowo służyć.

 

W całej Polsce zaś bydom wisieć te kolorowe bilbordy z roześmiotymi kandydatami i kandydatkami na urzyndy a kożdy z nich zaś jak co wybory bydzie mioł roztomkańte pomysły, jedyn chce naprawiać dziury w drogach, inkszy szkoły, jeszcze inkszy walczyć z bezrobociym i biydom. Wszyscy coś obiecujom, a nikierzi wyborcy już zmiarkowali, że te przedwyborcze obietnice to som czyste balachwasty, bo przeca wiymy, że czego nie dokonali za dziesiyńć lot tego przez trzi lata też jedyn człowiek nie zrobi. Nikiedy się im udow, bo wszyscy chcom tego samego i umiom się dogodać i prziszporowane piniondze dobrze wydać.

 

Prziszli samorzondowcy już się szykujom, tyngi głowy obiyrajom strategia, szykujom kampania. Nikiedy przi tymu się wadzom, jedni drugim szykujom sabotaż: ściepujom te wyborcze wywieszki, malujom fonsy, wielki uszy i dopisujom szpetne hasła czerwonom farbom. To się nazywo po uczonymu „niezdrowo rywalizacja”, bo przeca co im zależy: wygro i tak lepszy.

 

I to som te wontpliwości, kiere sie przed każdymi wyborami robiom bardzij wyraźniejsze! Trocha mie jest gańba, że staro baba styrko się do nie swoich spraw, ale dyć zbliżajom się wybory na kiere noleżało by iść, a kamratka mi godała, że takij starej głowie to mo pasować yno hut abo czopka. A możno to i prowda...

 

Ślonzoczka Aniela