Co to się w kochanym kraju wyrobio?

Zaś mie tytle (kusi), coby chycić taki tymat, co babie nie przistoji. Ale jak tak jednako się pisze o tym równouprawniyniu kobiet, to chca też te moji „piyńć fynikow” styrczyć.

 

Nejprzod jest mi żol tak światłej babki, jakom jest pani Zyta. Co to śniom robiom?

 

Co to się w tym naszym kochanym kraju wyrobio? Wybiyrajom do rzondzynio, wyciepujom, szczujom.

 

Jakby tak się przijrzeć wiela naszych piniyndzy idzie na same pukiety, bo tych co odchodzom żegno się kwiotkami i odprawom a tych, co przichodzom też trza witać kwiotkami, a i stołek trza dać im lepszy.

 

Tak bych ich przipasowała do dzieci w pioskownicy: „Tyś mi pobulył moja budka, to biera łopatka i wiaderko i ida dudom”. Ledwo przestali się z nas śmioć skiyrz sportowcow, to zaś świat dostoł nowy tymat: „Bo Johan brzidko o mie napisoł to jo tam nigdzi do żodnego Weimaru nie jada, bo mie boli brzuch”. Premier też nie pojechoł, bo czuł, że mu się coś „koło pióra” robi. Jest nom go szkoda, bo „Bliźniaki” tak poszykowały, że pan Kazimierz stoł się po ośmiu miesioncach żdżałym do wyciepnycio. On nie zginie, bo jest mondry, kieby yno zaś jakich sideł na niego nie naszykowali.

 

Żeby „somsiedzi” z zagranice chcieli od naszych gospodorzy kupować miynso, to musioł najwiynkszy polski Gospodorz jechać prosić.

 

O tym, że w Klewkach wylondowali Talibowie a w Wylatowie UFO to im nie godoł, bo by zaś się z nas śmioli.

 

Pan Roman wywalczył becikowe - niech się rodzom młode Poloki. A jak ich wychowiymy i wyszkolymy, to sztudynci - światli jak perełki pojadom za granica przodź wegetować a jak się na nich poznajom, bydom obcymu państwu, kiere ich przigarnyło przinosić chwoła. Jak Macierz nie umi zadbać o dzieci, to jest to kolejno gańba.

 

Dwa miliony odchowanych i wyuczonych (a możno yno mocnych?) wybywo ze swoji Ojczyzny, co się im stała macochom.

 

Jo tam ni ma żodnym farorzym jest ech ochrzczonom katoliczkom i czytom co trza, i wiym, że w jednym miejscu jest napisane: „Każde państwo szarpane niezgodom pustoszeje a dom na dom się wali” chyba to tak dokładnie nie stoji, ale tak to się mo rozumieć.

 

Możno i dobrze, że nasi królowie polscy „śpiom” w ciynżkich sarkofagach, bo jakby byli yno w trumnach, toby postowali i zrobiyli porzondek na tej przesionknytej polskom krwiom ziymi.

 

Panu Ludwikowi, co to uznoł, że ludzie z Ukrainy nie śmiom przijyżdżać zbiyrać owocow, kierych tak moc urosło, Mondrzejszy od niego na upomniyni zesłoł susza. Po ziorka na chlyb bydymy żebrać za granicom. Bo dyć godajom, że Ukraińce som nasi bracia, a przikozani o miyłości bliźnigo by się spełniyło jakby młodo, biydno Ukrainka w Polsce pora groszy zarobiyła, kiej polskim bezrobotnym się nie opłaco! Wiela nieszczyńścio byłoby myni jakby tak Polok zanim kogoś obszmaruje obejrzoł co pisze w ósmym przikozaniu. Wiela to ostudy narobyli tymi wyniesionymi po kryjomu aktami i roztomańtymi „listami” a teraz jedni się sondzom i szukajom sprawiedliwości, inkszych lustrujom bo podpadli. Najgorsze jest to, że końca nie widać. Możno dokończom to ci co się za „becikowe” urodziyli.

 

W nadziei, że dożyja nowych wyborów - aktualnie nerwowo.

 

Ślonzoczka Aniela