Obiecanki cacanki, a gupimu radość

Roztomili miołech łosprowiać o Mikołaju, ale myśla, że momy dużo ważniejszo rzecz do obgodanio. A dokładnie to, co sie dzieje, tam we Warszawie, w Sejmie.

I choć nigdy mie nie ruszało, co zaś tam klycom we stolicy, terozki czuja sie we obowiązku ciepnyć tymat do dyskusje.

Powiym wom, że trocha mie to wszysko nie dziwi, choć na taki rozmach ech nie liczoł. Po piyrsze ni momy prezydenta Dudy- yno Kaczyńskiego, po drugi ni momy premier Szydło yno- Kaczyńskiego, po trzeci to gratuluja tymu Panu mistrzostwa drugiego planu. Nigdzi sie nie podpisuje, a i tak rządzi. Do mie to je mistrzostwo świata.

Jak tyż to idzie ludziom zrobić prani mózgu i kupić ich za czopka śliwek.

Jak godo porzekadło: „obiecanki cacanki, a gupimu radość”. I my tyż jako społeczeństwo som takimi gupielokami, kierzi dajom se „wćisnyć kit”.

Jak sie na to dziwom, to wcale mie nie dziwi naszo historio. A to Targowica w XVIII wieku, kaj sprzedali my swoji Państwo, a to po wojnie komuna, na kiero chyntnie my prziklasnyli. Zresztom jak widać, ludzie „smolom” jako kiery rządzi, bele coś do. Ale żeby dać, to trza mieć z czego. Jedyn nom już dowoł i do dzisio spłacomy dłogi. Ale jak sie kiery spyto starsze pokolyni, kiedy było we Polsce dobrze- to za Gierka było nojlepszy.

I terozki momy powtórka z rozrywki. 500 zł na bajtla i szluz. Nie jedyn nie pudzie do roboty, yno weźnie sie za opłacalno produkcja, kiero ku tymu może być jeszcze przijymno. Na pewno przirost bydzie dużo lepszy, a za 10 lot momy Grecja, bo państwo tego nie udźwignie.

Do tego pudymy pryndzy na pyndzyjo, sama uciecha. Ale proponuja już od dziś suszyć chlyb, bo yno na wodzionka nas potym styknie.

Gratuluja nom jako społeczeństwu mądrości, dobrych wyborow i rozsądku. Pyrsk

klycom - gadajom

czopka  - czapka

smolom - mają to gdzieś…

szluz - koniec