Zdradliwy czas

Powiym wom, że latosio jesiyń i listopad pierońsko nos rozpiyszczajom. Ciepło choby na wiosna, słoneczko po puklu grzeje,  yno zielyni  coroz myni. A do tego ćimok egipski już ło piontyj popołedniu. Beztoż wiym na pewno, że momy listopad, zresztom jak jada kole kierchowa tyż to widza, jak wszysko gore.

Wszysko było by w porządku, keby niy to, że tako pogoda je pierzińsko zdradliwo. Człowiekowi  ciepło, to sie seblyko, zawieje wiater i już owioty. Do tego wszyskigo na jesiyń to aże od zarazkow sie mnoży, wszyndzi furgajom i już chorobsko gotowe.

Ku tymu człowiek nie wiy jako sie łoblyc. Bo rano mroz, w połednie chyc, a pod wieczor włażnie i mglisto.  I jako sie tu zestroić, yno na cebula.

Mie już tyż cosik chyto, a tu jakiś kuckani, a tu trocha ryma i człowiek do końca nie wiy co mu je. Do tego jakiś chycwele choby przi wekslach, beztoż trza sie pamiyntać i lyczyć po swojemu.

Jo proponuja: brołzupa, dużo czosku, no i nie zapomnijcie o cebuli, kiero je na kuckani jak znod. Do tego leśny tyj ze skużicom, grzebyczkami, abo grzote piwo z rozfyrlanym żołtkiym.  I żodno bakteryjno nos nie chyci.

Życza wom dużo zdrowio i udanego kurowanio sie. Pyrk

Furgajom - latajom

Włażnie - wilgotno

Chycwele - uderzenia ciepła

Weksle - przekwitanie