Zapomniane szmaki

Wiycie dużo sie godo terozki o jodle i jedzeniu. Jako to je? Wszyscy mogom sie wszyskigo dowiedzieć, a zastosować nie poradzom. Przeca tela sie trombi o tym co jeść i czego z czym nie fyrlać, a i tak ludziska robiom po swojimu.

Nojbardzi mie jednak mierzi, że nie chcymy słuchać mądrości naszych przodkow. Nikiedy łoni sami nie poradziyli pedzieć  czamu tak robiyli, ale jakby my to dzisio rozebrali na czynści piyrsze- to wyndzie, że wiedzieli jako sie dobrze kustować.

Wiycie bołech loto na takij szumnej imprezie, kiero sie mianowała Jesiynne Smaki. Musioł żech tam pokosztować roztomańtych dobroci i powiym wom, że powalyła mie kulinarnie, zupa z brukwii, na kiero piyrwej godali kwaki. Tak se myśla, po jakimu już sie u nos kwakow nie warzi? (yno jeszcze na Żywiecczyźnie zupa je modno). Piyrwej godali ludzie na nia zupa biydokow i to chyba skiż tego przestali jom warzić. To tak jak z kozami za Gierka. Ludzie przestali chować kozy, bo niby miały być symbolym  biydy.

A jeszcze tak pokludza ło tej zupie. Ni mocie pojyncio jako łona je zdrowo. Kwaki nie dość, że pełne witamin B, E i D, to jeszcze je w nich fol potasu i inszych mikroelemyntow.  Dobrze po nich fungujom jelita i żołądek, o całości nie spomna. A ku tymu som pierońsko dietetyczne, o smaku już nie spomna. Powiym wom, że skuli tego szmaku kiery łoto żech odkroł, rychtyk je we wercie odpowani starych receptow

Roztomili, jo mom postanowiyni - na bezrok musza posioć kwaki se na polu. Yno sie starom kaj znojda nasiyni. Ale jak to godajom, wto szuko, tyn znojdzie. Pyrsk!

Kustować - odżywiać

Pokludzić - poprowadzić

We wercie - warto