Zdaniem Ślązoczki - Nie czas żałować róż, gdy płoną lasy

Inkszo Ślonzoczka wypowiedziała sie bez złośliwości, trzimała strona miyszkańcow miasta, ale żałowała, że taki piykny zielony zakontek trza pobulić, ale godała ,że ludzie som ważniejsi. Kiedyś jakiś poeta napisoł: „ Nie czas żałować róż, gdy płoną lasy. To by tak pasowało do Rospudy. I jeszcze napisali:” Był las, nie było nas, będzie las nie będzie nas”. Możno sie ta prziroda sama obroni? Lasy odrosnom, ptoszki sie rozmnożom. Przeciwnicy Zielonych wytykajom im, że ważniejsze dlo nich som żaby i szczury, niż ludzie. Wyszli do Doliny z lampkami i krziżami. Zaczło sie spokojnie ale jak zaczli potrzonsać tymi krziżykami i wołać „ barbarzyńcy” ubliżyli swoimu człowieczyństwu, bo ich przeciwnicy to byli też ludzie, yno trocha zaślepiyni. Nikiedy obrona przirody obraco sie przeciw człowiekowi. Co majom robić gospodorze, przeważnie biydni jak bobry, kiere sie strasznie rozmnażajom na rzykach robiom tamy i woda zalywo, kaj jeszcze jaki konsek łonki abo pola. Już sie ekolodzy zgodziyli na „nocny odsztrzał”. Dziki świnie kiere żyjom w lasach przeryjom całe pole ze zimiokami a gospodoże muszom prosić o odszkodowani.

Jakby tak zestawić człowiek i prziroda wyszło by 1:0 dlo przirody, bo ona na razie jest cicho, a ludzie co chwila wymyślajom nowe ataki. Ostatnio gorole som wystraszyni, bo we swoich cichych wioskach pobudowali domy dlo wczasowiczow a ludzie zaś planujom puścić tam drogi. W pszczyńskich dostojnych lasach też już słychać piyły i sikiyry. Przisłowi “człowiek człowiekowi wilkiym” nabardzij widać we wsi kaj zamiast wybudować most, dali gospodarzowi kombinezon, w kierym przez rzyka przenosi cera do szkoły. Upokorzony tom decyzjom, oddoł dowod osobisty, bo ni mo należnych z tego dokumyntu praw.

U nas mieli inkszy problym z drogom, droga chcieli, ale żodyn sie nie zgodziył, żeby konsek pola przibrać, żeby ta droga poszyrzyć. Droga wybudowali, utwardziyli, dali nazwa ale...autobusa puścić nie idzie, bo tako wonsko i tela zakryntow jak na torze wyścigowym. Zdałoby sie rzec, że nikiedy dlo dobra ogółu stykło by trcha dobrej wole, a tego metra  pola przeca za nami nie powiezom, bo dajom nom dwa metry na „kympce”.

Ślonzoczko Aniela