Kolyndy już od października

Piyrsze w tych wiynkszych miastach,  na sklepach powywieszali napisy: „Wesołych Świąt” abo „Marry Christmas”. W telewizorze już słychać, że „coraz bliżej święta, coraz bliżej święta” a potym widać tego panoczka, kiery mrugo do nas okiym z  tego długigo auta. W jednej papiorzannej reklamie mieli na sprzedej łacne jodełki, świyrki, bombki, lańcuchy, lameta i roztomańte światełka do ostrojynio tego stromka abo chałupy  (to było pod koniec października). Obstrojone sztucznym śniegiym i gwiozdkami sklepowe witryny zachyncajom do przedświontecznych zakupow. Ostatnio też zaczły chodzić po sklepach i zachwolać łacno monka na świonteczno zista taki przerosnyte ribecale. Do nas Mikołaj z wielkim worym przichodziył zawsze 6 grudnia a tyn importowany koże wieszać czerwono fuzekla nad łożkiym. Nie dość, że za pryndko przijechoł, robi nas za błozna, to jeszcze bydzie u nas siedzioł aż do Sylwestra. Teraz yno muszymy czekać na aniołow z opłatkami, bo „mikołajki” we śmiysznych czerwonych czopkach z mrugajoncom bomblom  już som - pomogajom spakować te nakupione rzeczy do kolorowego świontecznego papioru, abo zachwolajom wonionce świonteczne świyczki, te, co „świynta zapraszajom zapachym”...
Już od października przi kupowaniu serweta na świonteczny stoł  idzie se posłuchać piyknych kolynd a kolorowe gazety robiom wyścigi na przepisy i na to jak obstroić na świynta obyńści. Ludzie chcom pryndko i  łacno nakupić geszynkow, a jak komu nie styknie gotowki to zawsze może wziońść świonteczny kredyt. Leko sie go biere, ale jak przidzie do wracanio to już jest gorszy. Inksi uciekajom jak najdali, już w w maju wykupiyli se wczasy do ciepłych krajow, żeby na świynta mieć swiynty spokoj... takim to dobrze. Ale u nas to jeszcze ni ma tak najgorszy, w Ameryce taki przedświonteczne wyprzedaże robiom już w lipcu... Wielki wystawy, pokazy, pełno „Mikołajow” z wytkanymi brzuchami i prziklejonymi siwymi brodami paraduje w trzidziestostopniowym chycu z ryniferami. A ludzie som zadowolyni, że mogom tela nowości pooglondać no i nakupić. Bo „biznes is biznes” a świynta swojom drogom.
Mie sie zdo, że ta przedwczesno przedświonteczno goronczka stowo sie coroz bardzij nomielito, i te świynta wcale nie bydom taki wesołe jak nom od październik winszowali, bo przeca wszystko umi sie zmierznyć...

Aniela Langer
laureatka konkursu „Ślązak Roku 1996”
w 2001 r. otrzymała tytuł „Ślązaka nad Ślązakami”