Wszystko swalyli na tyn nieszczynsny Internet

Jedni wszystko swalyli na telewizor, gazety i tyn nieszczynsny internet, kiery mioł być ku pomocy a sieje tela zgorszynio, inksi godajom zaś, że winni som ojcowie, kierzi nie umiom swoim łebkom rozkozać. A dyć to rodzice majom być idolami dlo swoch pociech a ni jakiś medialne dziwolongi.
Wszystki „nowości” przichodzom do nas z tego Wielkigo Świata i tak by sie zdało, że ta moda na „młodych gniewnych” też do nas zza oceanu prziwioło. To, co sie teraz wyprawio w moji prawie siwej głowie sie nie umi śmieścić. Dyć tego kiejś nie było. Skuli tego w ministerstwie na wartko radzom, co by, tu zrobić, żeby to wszystko przikludzić do porzondku. Na bezrok majom ruszyć te szkoły „pod specjalnym nadzorym”, w kierych majom mocnom rynkom dyscyplina trzimać emrytowani wojocy. Nikierym te szkoły pod kluczym zdajom sie niecherski i wontpiom, żeby to mogło co pomoc. A jak i to nie poskutkuje, to majom tych młodych bandziorow zawiyrać do corka i tam ich wytymperuje już kto inkszy. We wszystkich szkołach od prziszłego roku porzondku bydom doglondać specjalni wysłannicy tzw. „trójki”. Czy to za moich czasow było do pomyślynio, żeby rechtor boł sie do roboty chodzić. Teraz ani auta pod szkołom nie zostawiajom, bo sie bojom, że dostanom „oddawis” za zło ocyna abo uwaga na lekcji.
Miarka sie przebrała. Tym nastoletnim rozbekańcom trza tyn lańcuch trocha ukrocić, bo po mału traci sie nad nimi kontrola. Bydom mundurki, kiere przikryjom wszystki mankamynta, razym z kolczykami w pympku, sagimi nyrkami i wymustrowanymi bluzami. Bo jakby sie tak rychtyk przijrzeć tej naszej szkole to roz momy wrażyni, że som my na pokazie mody a roz, że w cyrku abo w zoo. Pofarbiczkowane na fiołkowo abo sfilcowane kudły, szczewiki na kozij ratce, pawi oko, blaszane ćwieki w uszach. Galoty z krokiym przi kolanach, za wielko bluza i zynknyto czopka na ogolonej głowie. I kaj tu o nauce myśleć jak sie mo na tapecie co inkszego? Trza tymu wszystkimu przitnyć rożki, żeby polsko szkoła nie była pośmiywiskiym dlo świata a polski uczyń katym abo ofiarom.

Aniela Langer
laureatka konkursu „Ślązak Roku 1996”
w 2001 r. otrzymała tytuł „Ślązaka nad Ślązakami”