W październiku nie yno trza żykać różaniec, ale tyż sadzić czosnek

W październiku nie yno trza żykać różaniec, ale tyż sadzić czosnek.Tyn zimowy je dycki piykniejszy niż wiosynny, beztoż ś nim do ziymie. A jo dycki, sadza czosku moc, bo bez niego ani rusz.

Chocioż jedni godajom, że po czosku ogromnie kożdego czuć. No ja, nie powiym, woń mo pieronym ostro, ale za to same zdrowi. Zresztom jak go pofyrlocie z zielonom pietruszkom, toż spokojnie przestanie czuć.

Bezmałaś już 5000 lot tymu znali czosnek i używali go w lyczyniu. A musza wom pedzieć, że czosnek nie jednego już poratowoł i postawioł na nogi. Bo lyczy ryma, kuckani i jak w karku boli.

Nie wiym czy wiycie, że działo przeciwzapalnie, ale tyż elegancko pomogo w lyczyniu bolokow i ran, kiere za pierona nie chcom sie wygojić. Piyrwej czoskiym lyczyli pleśniawki u bajtli. Je naturalnym antybiotykiem (dziynki alicinie, kiero mo, jak go pouciyromy), zwalczo wirusy, bakteryje, obniżo cukier i cholesterol, kiere co drugi przeca mo. A co nojważniejsze– obniżo ciśniyni krwie, bo związki kiere mo wzmocniajom tyntnice i działajom przeciwmiażdżycowo.

Bo bych zapomniał, czosnek choć przeważony działo tyż antygrzybiczo i pomogo nom w trowiyniu. Skiż tego jak bejcujecie miynsa, abo robicie woszt, bez czosku ani rusz. Jak to wszysko pisza, toż chyba wiyncy nie musza reklamować czosku.

Ale wiym tyż, że nasze starki już tam dobrze wiedziały co robiom, jak rychtowały kożdy dziyń wodzionka. Zresztom jeszcze wcale tak nie downo, w doma na wieczerzo co chwila mieli my pieczony chlyb, kiery sie pociyrało zombkiym czosku. Pychota.

Kochani Ludkowie używejcie czosku, bo to je cudowny lyk. Zresztom kieryś kiejś padoł– „jydzcie czosnek i śledzie, a bydziecie zdrowi jak niedźwiedzie”.

Udanego czoskowanio, pyrsk!

Wodzionka – zupa chlebowa

Ryma – katar

Kuckani – kaszel

Moc – dużo

Styrkać – wsadzać

Audycja „Rączka gotuje” również w Radiu Vanessa FM od poniedziałku do soboty o 11.45 i 16.45