Niepotrzebno haja

Wiycie tele sie terozki słyszy o protestach, czornych i biołych marszach, że człowiek nie wiy co myśleć. W gowie mie sie kotłuje od tego wszyskigo, bo co człowiek włączy, to durch kieryś sie hajuje o to, wto mo recht.

Po mojimu, to niezło momy pożywka polityczno. Przeca ło czym by godali nasi politycy, jak by se nie robiyli problymow. A tak co nie puścisz pudła, tam ło czymś klepiom. A przi tymu, jak je haja, toż idzie zamiyźć roztomańte marasy pod tepich. Dlo przikładu, jak sie piyknie obsadzo roztomańte stanowiska, ludziami bez kwalifikacji. Przepraszom, podle naszej władzy– z pełnymi kwalifikacjami. Co za problym z salowej zrobić inspektora. Idzie? Jasne, że ja.

Ale chca jeszcze pokludzić o problymie aborcji.

Czy nie zdo wom sie, że to co było, wcale nie było taki złe, ale chca yno skromnie dodać, że przeca kożdy mo decydować w życiu podle swojigo sumiynio. I to czy chce urodzić chore dziecko i go wychowywać noleży do spraw prywatnych. Przeca praktykujący katolik, 100 razy sie zastanowi co zrobić. I tu słowa naszego ukochanego papiyża, dzisio już świyntego mogom pomoc w decyzji.

Do mie ta sprawa– to je sprawa sumiynio, a nie decyzyjności politykow.

Zresztom mom w swoji familiji– 2 przipadki chorych dzieci, dzisio już dorosłych. I to właśnie sumiyni mojich ciotek sprawiyło, że żyjom, a łone niesom swoj krziż przez cołkie życie.

Pamiyntejcie, kożdy bydzie kiejś odpowiadoł, za to co zrobioł i co robi. A politycy niech sie weznom do roboty, żeby nom sie lepszy żyło. Pyrsk!

Haja – kłótnia

recht – racja

tepich – dywan

Audycja „Rączka gotuje” również w Radiu Vanessa FM od poniedziałku do soboty o 11.45 i 16.45