Zimy nie było, wiosny nie widać

Powiym Wom, że latoś z tom naszom pogodom to już idzie ipi dostać. Zimy nie było, toż sie zdało, że wiosna już bydzie łod stycznia. A tu psińco. Durch yno sipi, zima, wiatry, zamroczone i słońca ani do gorści. A w marcu to już by trza było sie trocha wygrzoć słoneczkiym.

Godajom, że marcowe promyczki som nojlepsze, bo i rajmatyka wygrzywajom, o witaminie D nie spomna. Choć terozki w telewizorze durch trombiom, żeby brać pilulki, po kierych, witaminy D je tela, wiela trza. A to je wielki cygaństwo, skiż tego, że witamina D sie produkuje pod naszom skorom, pod wpływym słońca. Beztoż natury nie pocyganisz, a jak już, to możesz nabić kapsa koncernom farmaceutycznym.

Ale wroca sie do sprawy naszej aury. Powiym Wom, że nie dzieje sie dobrze. Kaś sie wszysko zaczyno zaciyrać. Bo lata corozki bardzij hyclawe, a potym to już yno odwieczno szaruga i jesiyń. Nikiedy sie czuja chobych miyszkoł we Szkocji - wilgotno, mokro i bez mrozu. Jedno je pewno, ta pogoda nom Polokom nie bardzo pasuje. Bo tu człowieka szcziko, tu szkubie, o bajtlach już nie spomna - bo durch hyrlajom i łażom ze rymom.

No i jeszcze sprawa świąt - terozki człowiek nie wiy jaki majom być świynta, bo pogoda gynał tako sama.

Nie wiym, czymu sie tak dzieje, czy bez te fligry kiere durch furgajom po niebie i przeganiajom chmury, czy skiż globalnego ocieplynio? Ale kaj tu ocieplyni, jak w marcu durch yno pierońsko zima. Już by trza było wlazić do zegrody, a w rynce oziombo.

No nic trza czakać i durch se powtarzać: „bele do wiosny”.

A potym w jedyn tydziyń ze korzuchow wskoczymy w krotki rynkowki. Pyrsk.

sipi – mrzawka

pilulki – tabletki

psińco – nic

rajmatyka – reumatyzm

hyrlać – kaszleć