Czas na bania

Witejcie roztomili Ludkowie.

Ni mocie pojyncio jak jo je rod, że w końcu prziszli my po rozum do gowy i wracomy sie nazod do tego co nasze i tradycyjne. Ale tak po prowdzie, troszka pomogła nom w tym ta moda, kiero prziszła drek aż z Ameryki na banie. Jedni wyciepujom tyn środek i styrkajom tam świyczka, keby im to piyknie wyglondało, inksi dowajom przed dźwiyrze z chałupy, a jo wola bania zjeś. Bo jo pierońsko zdrowo, ale o tym zaro byda kludzić dali.

Drugo połowica października, to już je czas, że cza z pola sraniać banie, bo mroz może sieknonć i bydzie z banie dżist. A rychtyk by było szkoda. Słyszołech też łostatnio o bani kiero wożyła 6 cyntow i wygrało konkurs na nojwiynkszo bania w Polsce.

Kochani Ludkowie, jak se tak nikiedy siedza, to se myśla, że te nasze omy były pierońsko mondre, a przeca sztudyjow ni miały pokończonych. Wiedziały co je dobre i zdrowe i poradziły to jeszcze przirychtować. Tak też było z baniom. Dobry kompot z banie, zupa czy placki– tego szło pokosztować u naszych om.

Ale nie wiym, czy wiycie, że bania mo mało kaloryji (to je informacjo do szlangierow, kiere wszyskigo bojom sie jeś, żeby yno nie srubnyć), je zdrowo, a nojbardzi, to te pecki. Pecki cza yno posuszyć i idzie ich chrupać – chopy radza wom, bo je to przeciw prostacie, skiż tego, że je tam dużo cynku. No a kompot z banie możecie se dać abo do krałzy, abo uważić na świyżo. Yno, żeby to szmakowało, cza tam dać grzebyczkow, skurzice, wanilie, octu, cukru i wtedy mucha niy siodo, co to tak szmakuje. Kompot musi woniać prziprawami i być lekko pokwaskowaty. Wożcie bania, a  bydziecie zdrowi jak łania.

Udanego parszczynio i zaprawianio. Pyrsk!

Słowniczek dlo bajtli:

• Sraniać – chować
• Dżist – papka
• Szlangiera – szczupła osoba
• Pecki – pestki
• Grzebyczki – goździki
• Skurzica – cynamon
• Parszczyć – gotować
• Zaprawiać – robić weki