Dziyń Bajtla

Godo sie, że bajtle dzisio majom wszysko. Bo rychtyk tak je. Graczkow cołkie fachy i szranki, tablety, smartfony, i-pady i kaj jaki pieroństwo o kierym ani mi sie śniyło.

Do tego jeszcze laptopy, gry komputerowe, że z chałpy sie nie chce im wylazić, bo i po co?

A czymu tak sie dzieje? A skuli tego, że kożdy z nos chce, żeby bajtle sie miały lepszy niż my. A jako, że za komuny nic nie było, to wynagrodzomy to naszym pociechom i kupujymy co yno zapragnom. I tak kołko sie zamyko.

Pytani, czy to je dobre i kaj to kludzi?

Dobre z tego wzglyndu, że bajtle sie rozwijajom, a złe, że co za dużo, to nie zdrowo. A bardzi idzie mi o to, że jak wszysko majom, toż se tego nie szanujom.

Beztoż kochani Ludkowie, na dziyń Bajtla nie zasypcie waszych pociech nowymi sprzyntami, yno weźcie ich w ciekawe miejsca, a takich terozki na Ślońsku nie brakuje. Bo je przeca Park Miniatur w Inwałdzie, miasteczko westernowe we Żorach, park rozrywki w Ochabach. Abo jeszcze lepszy, zrobcie im wycieczka do lasu, przi tymu piknik i już bydzie cudownie. A wierzcie mi, że bajtle bydom spominać przez lata właśnie to, a nie, że dostali nowo rzecz, kiero pociepnom do kąta na drugi dziyń.

Zrobcie waszym bajtlom piykny geszynk, o kierym bydom godać latami.

Pyrsk!

Graczka – zabawka

Szrank – szafa

Fach – półka