Toszecko magia

Wiycie dużo ostatnio rajzuja po roztomańtych miejscach, kaj poszykowane som świąteczne jarmarki. I uzaś trza prziznać, że prziszła i do nas ta moda z Nimiec, Austrie, kaj je to fest modne, a do tego piykne.

Kożdo miejscowość prześcigo sie w tym, żeby jarmark boł nojpiykniejszy, a do tego mioł kupa atrakcji. I jo tyż tak jeżdża i warza roztomańte prziszmaki.

Ale dzisio nie chca godać o kuście, yno o, jak to sie terozki godo, atmosferze.

I musza wom zdradzić, że Jarmark w Toszku przebioł wszystkich.

Cudownie postrojono uliczka przi rynku. Przi kożdym sztandzie goiki, kristbaumy i kupa światełek. Na pojśrodku kokśioki, przi kierych sie idzie łogrzoć i woń grzańcow z grzebyczkami i apluzynami. Magia adwentu i świont kiere chnet bydom.

No i do tego żodnego haharstawa, ludzie grzecznie stojom, przidziwujom sie, a przede wszystkim dobrze sie bawiom. Sama uciecha widzieć coś takigo.

Bo roztomańcie to bywo. Byłech tyż na inszym jarmarku, kaj co drugi boł ożarty, a nojwazniejsze było to, czy bydzie cosik za darmo.

A przi jarmarkach nie ło to idzie. Tam ludzie majom przijś, pogodać ze sobom, pośmioć i poczuć przede wszystkim klimat świonteczny.

A na dalszo czynść adwentu życza udanych wypiekow i dobrego przirychtowanio sie do świont.

Goik – gałązka igliwia

Kristbaum – choinka

Apluzyna – pomarańcza

Haharstwo – złe zachowanie