Szpil jak pieron

Wiycie miołech rozprowiać o grzibach, ale przeca pomału fujo śniyg, zimnica jak pieron. A ku tymu bołech łoto na grzibach i nie znojd ech nic. To i ło czym tu godać!

O pogodzie tyż szkoda godać- przeca tydziyń tymu mieli my lato, a terozki momy zima. I kaj ta jesiyń? W kalyndorzu. Beztoż nie byda sie skuli tego rozwodzić.

Za to po niedzielnym meczu, nie bardzo idzie rozprowiać o czym inszym- jak yno o Fusbalu. W końcu po tych ciynkich latach, mono prziszły te maśniejsze i nasz fusbal uzaś do nom kupa radości. Dobrze to już w polskim Fusbalu było- jeszcze za Gierka, ale pamiyntejcie, że historio dycki kołym sie toczy. Pinkło 40 lot z groszami i zaczło sie dobrze dzioć. I niech tak łostanie.

Ale co nojważniejsze- bydymy na bezrok grać na Euro 2016 i z tego trza sie cieszyć.

Ale nie było by wielkigo Fusbala, keby nie „mistrze ceremonie”. No myśla, że to co robi Lewandowski- to je mistrzostwo świata. Nie dość, że je bohaterym Bajerokow we Nimcach, to pokozoł swoja klasa i na naszym „Narodowym”. Beztoż moga go mianować i naszym bohaterym. Do tego skromny, pokorny i na pewno nie gro w Fusbal yno skuli „kasy”.

Podle mie to je jego pasjo, a to bardzi uskrzidlo niż zera na koncie.

Wiycie, życzoł bych nom jeszcze tak ze 2-3 takich Lewandowskich. A teraz to yno muszymy trzimać kciuki za forma naszych „synkow” i niech na bezrok pokożom klasa. Pyrsk!

Fusbal – piłka nożna

maśniejsze – bardziej tłuste

Bajerok – Bawarczyk