Z hycym ni ma żartow

Wszyscy czakajom na lato, a jak już go momy to sztyc halatomy, że ciepło, że duszno, że ni ma czym dychać. I jako tu ludziom wygodzić? Nie powiym 35 stopni w naszym klimacie, to je na zabój, ale z pretensjami chyba do Pon Boczka.

Starsi godajom, że piyrwej lata nie były taki hyclawe, ale to chyba skuli tego, że terozki momy globalne ocieplyni. Przeca wszysko grzeje- lodowki, szpilmaszyny, pralki. A piyrwej co miało ogrzywać klimat? Rompla, a miska z wodom w kierej baby moczyły gorki. No nie bardzo.

Co zrobić, momy 2015 i globalne ocieplyni- lata suche, hyclawe, a do tego sztyc jakiś wiatry. Trza se z tym jakoś radzić.

Jo proponuja na taki hyc zacznyć od środka. To znaczy dobry chłodnik z ogorka świyżego z kiszkom i ogorkom kiszonom chłodzi lepszy niż nie jedna klima.

Z dań głównych nie polecom na taki hyc miynsa, bo yno sie ciepło po nim robi. Ale za to dobre placki z zimiokow z maślonkom som jak znod.

A na deser kompocik. Nojlepszy z rabarberu z małom domieszkom fefermynicy. Chłodzi jak trza.

A tak w ogóle, dziynki Bogu hyce roz dwa przyndom i pudzie normalnie żyć.

Pamiyntejcie w te ciepłe dni, żeby dycki mieć hut na gowie i dużo pić, nie koniecznie gorzołki, yno wody abo kompotu. Do tego nogi w misce z wodom tyż dobrze nos chłodzom. Roztomili życza wom troszka chłodu. Pyrsk

Hyc – upał

Szpilmaszyna – zmywarka

Fefermynica – mięta

Kiszka – zsiadłe mleko