Perełka Ślońska

Wiycie, terozki we sobota rychtyk sie dużo dzioło. I choć hyc boł jak na Saharze, to na cołkim Ślońsku, tam kaj yno som zabytki techniki wszyjscy fajrowali Industriada.

A coż to je ta industriada? A impreza, kiero mo swoj kolor naczelny- je to pomarańczowy, a polygo na tym, że pokazuje sie wszystkie miejsca na Ślońsku wpisane na Szlak Zabytkow Techniki. Dejmy na to, nojbliży nos: Hoym Gruba na Hoymie, czy Familoki we Czerwionce.

Do tego w miejscach tych lecom roztomańte koncerty, a ludziska se mogom pofajrować.

Ale chca wom troszka połosprowiać o osiedlu Familoki we Czerwionce.

Do mie to je perełka śląskij architektury. Przeszło 100 familokow, ustawionych kole siebie, piyknie obsadzonych kwiyciym. A do tego zadbane stromki, zegrodki kole każdego familoka. Dzisio elegancko odpicowane som wizytówkom Czerwionki.

Ale tak se myśla, jakie to musiało być w zocy, jeszcze przed wojnom. Na tym osiedlu było wszysko: kościoł, magiel, piekorz, masoż, doktor. A do tego kożdy mioł zegrodka, chlywiki, pynica i gorka na suszyni pranio. No i nojważniejsze, pewno robota na grubie Dymbiyńsko.

Roztomili Ludkowie, nie umia sie nadziwić, że przeszło 100 lot tymu wtoś poradzioł tak to poszykować. Osiedle było samowystarczalne, a i na Zug nie było daleko i wszydzi szło dojechać.

Musza wom pedzieć, że jak żech tam je, to czuja sie jak ryba we wodzie. Bo wszysko co ślońskie mom we krwi.

Jak bydziecie w Czerwionce nadjedzcie na Familoki, bo rychtyk je co podziwiać. Pyrsk!

Hyc – upał

Gorka – poddasze

Zug – pociąg

Familok – blok wielorodzinny