Kusku na dziyń matki

Wtoś kiedyś napisoł słowa piosynki: „nojmilejszo w życiu je mi mama”.

Nie wiym czymu, ale na fajerach i weselach już tego żodyn nie śpiywo, bo wszyjscy wtedy ślimtajom. A baby terozki majom make- up- y, beztoz miały by cołki gymby rozmazane, a kożdy sie terozki musi prezyntować. A jo se tak myśla, że jednak było to piykne, a płacz nie oznaczo niczego złego (chopy tyż mogom se pochlipać).

No a nasze mamulki? Trocha się pozmiyniało w tym naszym życiu. Jeszcze 30 lot tymu, wiynkszo połowa miała mamy w doma., kiere czakały z łobiadiym na kożdego domownika. Szło pedzieć, że matka była piastukom domowego łogniska.

Dzisio matki majom troszka ciynżyj. I choć je już telko technika, to wcale jim nie zowiszcza tego cołkigo zamiyszanio. Robota, łobiod, prani, bajtle do szkoły, przedszkola i sztyc łogon w postaci komorki, kiery dzwoni i przeszkodzo.. A do tego czasy wymagajom, że we robocie tyż trza wyglondać, beztoż kosmetyczka, frizjer i inksze.  Ni ma lekko ciynżko żyć

Jak tak ło tym pisza, to se myśla, że trza to naszym mamulkom wynagrodzić i chocioż zrobić jaki ciekawy geszynk skuli dnia matki. Choćby kwiotek, jakiś dobry łobiod, abo kawa.

Roztomili Ludkowie nie zapomnijcie ło swojich mamulkach, bo przeca : „nojmilejszo w życiu je mi mama”.

Pyrsk

fajer – impreza okolicznościowa

zawiść – zazdrość

ślimtajom – płaczą