Nowoczesny Kust, a zdrowi

Tela sie terozki  godo o zdrowym odżywianiu, dietach, że gowa od samego słuchanio boli. Człowiek se myśli, że źle jy, bo przeca za masno, za mało gymizy, owocow i co kaj yno bądź. A tak po prowdzie co pora lot kieryś coś blefnie i zaś idzie fama.  Jeszcze pora lot tymu była „zdrowo” margarina, bo przeca serce ja dzwon, jajec nojlepszy nie jeść wcale, bo cholesterol. Terozki i kawa już je zdrowo, tyj ze cytrynom szkodzi, a golonko nos zabijo (bo miażdżyca i zatykani żył).

Jak sie na to wszysko dziwom, to już mom taki myntlik we gowie, że nie wiym nic. I sztyc ształnuja, co tu jeść, żeby być zdrowym?

I powiym wom yno tela, że postawia na mądrość ludowo, a do tego zaczna słuchać samego siebie. Mój stażik dycki godoł, „JYDZ TO NA CO MOSZ SZMAK. A JAK MOSZ SZMAK TO CI NIE ZASZKODZI” Przeca ludzie piyrwej badań żodnych naukowych nie znali, a jedli i żyli w zdrowiu. Używali masła, fetu, wszystko maściyli i byli zdrowi. Do tego dziynnie kiszka, maślonka i zimioki. O kapuście już nie spomna. Owoce jedli yno wtedy jak były na stromach (a terozki momy dziynnie jeść owoce- nojlepszy ze sklepu 20 razy fukane). Do tego momy durch jeść szałoty, choby jaki króliki. Nie powiym, ludzie kiejś jodali sałoty ale yno masłowe, bo inkszych nie było.

Mi sie zdo, że przesadzomy terozki z tym zimnym jedzyniym. Na łobiod suszi, na wieczero mix sałat i czym tu zagrzoć żołądek. A starzi ludzie godali, że dziennie trza sie czymś zagrzoć.

Beztoż wracejcie sie do korzyni, bo w korzyniach siyła.

Pyrsk.

Maścić – okraszać

Kiszka – kwaśne mleko

Stromy – drzewa