Wiosynne przebudzyni

Godajom, że jak boczonie przifurgnyły nazad, toż zimy już nie bydzie. Beztoż pozwoloł ech se napisać, że już je chyba po zimie forbaj.

Nie wiym, czy tyż tak mocie, ale wy mie wlazła wiosynno energio, a wszysko skuli tego, że rano łod piontej już ćwiyrkajom ptoszki, słoneczko grzeje po puklu i jako sie tu nie budzić.

Pomału też, by trza było chytać sie porządkow na dworze, wszysko pograbić, zegroda zryć, no i sioć (bo godajom, że nojlepsze plony po siywie przed niedzielom palmowom).

Ale porządki tyż trza zrobić ze sobom, ruszyć te przisłowiowe sztyry literki i zacznyć sie ruszać po zimowym letargu. Jedni na pewno ruszom- z piwym i wosztym na zagroda.

Ale nie ło taki ruszani mi idzie. Nojlepszy łoblydz owerol i ruszyć w świat (troszka polotać, poćwiczyć na świyżym lufcie), a i gimnastyka w zegrodce z łopatom i kopaczkom nie zaszkodzi. Jednak dobrze by było zrobić se mało rozgrzywka, żeby nos heksynszloz nie trefioł. A ło to po zimowym zastociu ni ma ciynżko.

Nie wiym, czy wiycie, że marcowe słoneczko je nejzdrowsze (bo bez szkodliwych UV), dowo nom dużo witaminy D, bez kierej ani rusz.

Namawiam wos tyż do zrobiynio se małej zegrodki w  kierej bydziecie mieli roztomańty grincojg (szałoty, sznytloch, pietruszka, merekwia, radistki i kaj yno co bądź). Bydziecie nie yno mogli z tego skorzystać, ale i  ruchu wom nie braknie, bo trza bydzie to oplyć. A do tego jak sie zielyni w zegrodzie, to aż uciecha sie dziwać.

Roztomili życza wom udanego przebudzynio, pyrsk.

Boczonie – bociany

Owerol – dres

Heksynszloz – łamanie w krzyżu

Grincojg – zielenina

Sznytloch – szczypior