Nie zapomnijcie ło swojich starzikach

Tyn czas tak zaiwanio, że momy już chned koniec stycznia- a wtedy dycki momy dziyń Babcie i Dziadka (bo terozki niy godo sie już starki i starzika). Przeca współczesne babcie nie som starkami we chustkach, a 50 lot- to je kwiat wieku.

No ja wszysko sie zmiynio, świat idzie do przodku, a ludzie chcom być sztyc młodzi, choć na „liczniku” nikiedy dużo.

A jaki som teraz te dziadki? To, że młode duchym to już wiymy.

Czy łoni som inksi od tych naszych starzikow?

Jo myśla, że niy, przeca tak samo nom przajom, jak i nom przoły nasze stażiki.

Myśla yno, że zmiyniyło sie to, że dzisiejszy dziadek i babcia to do bajtli, podlotkow tzw. sponsory. Wnuczek coś zrobi, a babcia płaci (a potym sie dziwiymy, że pokolyni młodych ludzi je materialistami i bezinteresownie nie robi nic).

Zmiyniyło sie też to, że starziki były dlo nos skarbnicom wiedzy, przekozywali nom mądrości życiowe, kierych uczyli sie cołki żywot. A teraz słyszymy: ”babcia to już ni ma modne, tak sie nie robi, teraz je inakszy”.

I coś w tym je, bo przeważnie wnuki uczom babcie i dziadkow na komputerze, komórce- a przeca downij było blank na opach.

Yno tak ształnuja, czy wszysko teraz je inksze? Przeca som rzeczy, wartości kiere zawsze bydom taki same, jak to sie modnie teraz nazywo- uniwersalne. Podle mie to, żeby być uczciwym, robotnym, szporobliwym, a właśnie tego nauczyli mie moje, świyntej pamiynci starziki i to bez tzw. kasy.

Nie zapomnijcie ło swojich starzikach w tym tydniu. Pyrsk.

Sztyc – bez przerwy

Przoć – kochać

Ształnuja – zastanawiam się

Szporobliwy – oszczędny