Na gupota ni ma rady

Wiycie w doma mie dycki uczyli - „synek nie śmisz sie wychylać, nie być przemądrzały i nie skokej, bo wyskoczysz za daleko”. Bez cołki życi starołech sie tego czimać, ale powiym wom miyndzy Bogiym, a prowdom, że nikiedy cza zostawić zasady na boku i zapieronić wiela wlezie. I tak też sie sy mnom stało. Bo jo wszysko rozumia, ale z gupotom byda dycki walczoł.

Wiycie łoto, jakoś na mie spadły, jak to sie godo, praje wszyski plagi egipski. Przeca co nas nie zabije, to nos zmocni. Ale już wom godom ło co mi idzie.

Miołech kontrola, no i przi tymu, pani kiero mie kontrolowała w zalecyniu nakozała mi zamontować taki zwyrtek (wentylator mechaniczny), kierego i tak żodyn nie załonczo i je poczebny jak umrzytymu kadzidło - ale taki je polski prawo i taki miała kaprys. Szkoda, że jo ni moga mieć kaprysow. Nie spomna już, że to też kosztuje, a z nieba mi nie kapie (chocioż chciołbych).

Wiycie jo moga robić dużo rzeczy i sie dostosowywać, ale gupoty nie poprza nigdy.

Drugo inszo sprawa: miołech zrobić opłata, ale nie przeszoł przelyw i boł zaksiyngowany dziyń nieskożi. Żodyn sie nie spytał czamu, yno terozki byda poł roku odkryncać ta sprawa. Szkoda, że choćby nasz wspaniały Marszałek Sejmu, czy politycy po aferach nie muszom niczego odkryncać.

Wiycie prowadza firma, płaca podatki, dowom ludziom robota, czyli dotuja nasze państwo i co? I sztyc pod kympka.

Podle mie nic sie nie zmieni, pod wiela ci kierzi tam siedzom (we Sejmie) nie bydom mieli pojyncio ło prawie i polityce. A siedzieć tam może kożdy i tak po prowdzie tworzyć polski prawo. Pamiyntejcie ło tym jak bydziecie wybierać. Pyrsk!

Zapieronić – zagrzmieć

Łoto – niedawno

Kympka – górka