Tyrolski porządek

Wiycie chocioż je żech „lokalnym patriotom” to mojim miejscym na ziymi kaj rychtyk sie umia zresetować, czyli fest dychnyć je Tyrol.

Latoś kieryś roz już, fechtnoł ech sie na Tyrol, ale nie ło tym chca kludzić, żeby sie kiery nie pomyśloł, że zy mie je chwolno żi..

Mie yno idzie o to, że je to miejsce cudowne- bo som tam gory z takmi widokami, że człowiekowi brakuje słow. Do tego świyży luft, kierym rychtyk idzie sie sztachnyć, no i tradycjo, kiero do Tyrolczykow je nojważniejszo.

Uwierzycie, że łoni we niedziela majom wszysko pozawiyrane, choć mogli by se dużo przidubnyć na turystach. Niy, łoni we niedziela fajrujom. Byście widzieli jak wszyjscy- starki, stażiki, bajtle, chopy, baby idom we strojach ludowych nojprzod do kościoła, a popołedniu na fajer. Tam grajom muzykanty, ludzie tańcujom, śmiejom sie, ale przede wszyskim do kupy se fajrujom.

Ale nojbardzi, to zowiszcza (ale tak pozytywnie) tego porządku (kożdo krauza musi być umyto niż je łoddano do śmieci). Tam kożdy szanuje sąsiada i yno kupuje to co je łod nich. Mlyczorz idzie do frizjera, ale frizjer musi kupić mleko yno u niego. I to je porządek. Za to u nas je blank inakszy- przeca nie dom zarobić sąsiadowi. Beztoż my som jeszcze daleko za nimi.

I co mie jeszcze w Tyrolu zadziwio, to, to że tam kożdy czy cie zno, abo niy, godo ci cześć, dziyń dobry i dycki sie uśmiychnie. A jak kaj wlazujesz do sklepu, to jak to w kraju katolickim godo sie Gruss Gott, czyli szczynść Boże.

Mie to rychtyk pasuje, a  jak by wom prziszła chęć, toż zbiyrejcie sie na Tyrol. Pyrsk.

Sztachnyć – załknąć

Przidubnyć – dorobić

Blank inakszy – całkiem inaczej

Dychnyć – odpocząć