Społeczno znieczulica

Wiycie, dużo sie kole nos zmiynio, świat idzie do przodku, ludzie inakszy żyjom, ale som podle mie wartości: moralne, społeczne, kiere ni majom prawa sie miynić.

Cza se przoć, szanować, ale i mieć jakoś wrażliwość społeczno. Myśla, że tak jak tera to jeszcze nie było nigdy. Nie wiym czamu?

Przeca piyrwyj jedyn drugimu pomogoł, a terozki, jak ludzie by umieli, to se z karku wytargajom, co yno idzie. Ale nie o tym chca kludzić.

Łoto, pora dni tymu ważoł ech na wielkij imprezie, kaj było fol ludzi. Boł tam mały unfal. Na mojich oczach, ale i tych wszystkich ludzi obulyła sie wroz babka. I wy myślicie, że sie kiery tym zainteresował. Przeca to nie łod nich problym. Do mie to boł szok! A drugim szokiem było, to, że ludzie kozali jom posunyć kaj indzi, bo zawadzo i nie idzie dostać do jodła. Moga to mianować znieczulicom społecznom.

Ta znieczulica dostała nos fest. To sie tyczy tyż tego, jak terozki traktujymy stażikow. Nie tak jak cza, z szacunkiem za wiedza, za to co nom dali, ale jak zło konieczne, wapaniakow i dziadow, kierzi yno zawadzajom.

Ludzie opamiyntejcie się, bo bydzie społeczno klynska. Pamiyntejcie, tyż bydziecie stażi i tyż wom sie mogom przitrefić roztomańte rzeczy. Pyrsk.

Przoć – kochać

Piyrwej – kiedyś

Obulyła – przewróciła się

Unfal – wypadek