Lodowka fol

Świynta, świynta i po świyntach. Ale za to lodowka durch fol.. Kożdy przeca się boji, że mu jodła we świynta braknie, a na Ślońsku lubiymy dycki na bogato. Muszom przeca być kołocze, zisty, baranki, zajonce, szinki, boczki, jajca i roztomańte harynki. Yno je jedyn problym- kożdy z nos mo jedyn żołondek i choby nie wiym jak sie staroł przeca wiyncy nie wciśnie.

Tako już momy natura, że dycki za dużo kupujymy. Jak nikiedy widza tych ludzi we sklepach z tymi fol korabami, to se myśla: „Pon Boczku drogi, wielaż też idzie zjeś”.

Nejgorszy je to, że nakupujymy, a potym się z tym tropiymy, żeby na hama zjeś. A tela je ludzi na tym bożym świecie, co krajiczka radzinku ni majom do gymby.

Beztoż idzie dycki kupić myni, abo sie podzielić. Ale to sie tak piyknie godo, ale wycyrklować ciynżko. A jak by wom tak praje zostało po świyntach, toż też mom recepta.

Przeca idzie naważić żuru z wosztami abo zrobić dobry bigos, kiery z takimi dobrociami musi szmakować. A bigos czym starszy tym lepszy, no i zawsze idzie go zamrozić.

Po świyntach proponuje tyż dużo ruchu, kiery na pewno żodnymu nie zaszkodzi. A ruch przeca to zdrowi. Toż życza wom dużo zdrowio, no i smacznego ważynio. Pyrsk!

Harynki – śledzie

Karab – wózek

Woszt – kiełbasa

Krajiczek – kromka