Pogoda dostanie ipi

Nie chca być złym prorokiym, ale nic dobrego ni ma, tako wczaśno wiosna. Bo i stromki w marcu zakwitły, o inszych rzeczach nie spomna.

A nasza starka dycki godali- wiosna wczas, bydzie yno trowa jak las. Beztoż nie spodziywejcie sie cudow w plonach. Cołko gymiza zeżere roztomańte chrobadztwo kiere nie wymarzło bez zima. Przeca zimy nie było.

A i łoto słuchoł ech takich naukowcow ze Ameryki (a wiycie, że łoni wszysko wiedzom), że latoś lata nie bydzie, yno wieczno jesień z zimom do kupy. A wszysko bez to, że te masy luftu jakoś inakszy lecom. Bez to w zima było ciepło, a bez lato bydzie zima i miejscami w gorach mroz i śniyg.

Godali też, żeby na lato szykować kufaje i ciepłe szczewiki, bo eźli bydzie pogoda, to tak do 15 stopni ciepła. A we lipcu i sierpniu mo sztyc padać, bo to bydzie tako pora deszczowo. To mocie pojynci jaki bydzom żniwa, suszyni siana. Żodne. Nejgorszy, że i człowiek grila se nie machnie, bo bydzie sztyc zima.

Co zrobić, na to ni ma rady. Bez to pod wiela je terozki pogoda, wygrzywejcie sie wiela wlezie, bo od połowy kwiynia mo sie pierońsko ochłodzić.

Nojważniejsze je to, żeby sie uśmiechać, bo tela z tego żywota momy, co sie pośmiejymy. Pyrsk!

Gymiza – warzywa

Stromki – drzewka

Do kupy – razem

Kufaja – waciak