Ukraiński młyn

Pyrsk Ludkowie! Miołech Wom napisać o ostatkowym harynku, ale myśla, że ta sprawa je dużo ważniejszo. Na Ukrainie sie już miele dłogo, ale takigo scynariusza żech se w życiu nie wyobrażoł. A nom dycki starka godali, że od Rusyje jeszcze nic dobrego nie prziszlo, ani wiater.  Wtedy nie wiedziołech czamu tak godajom, ale dzisio żech sie kapnoł, że nasza starka co rusz mieli recht, choć wielkich szkołow nie pokończyli.

Powiym wom, że z tego ukraińskigo kotła może być pieroństwo. I cza dobrze pożykać, żeby nie stało sie tak jak 100 lot tymu  czyli w 1914 roku we Sarajewie. Cza też  dobrze pożykać,  za rozsądek tych,  kierzi pociągajom za te sznoreczki na wiyrchu.

Z jednego je żech rod, że som my w Nato. Zawsze to jakiś poczuci wiynkszego bezpieczyństwa. Ale za Rusa nie idzie se być pewnym. Jak z Putinym zjysz śniodani, to obiadu nie czakej. Nejgorszy jak do rządzynio dociśnie sie człowiek, kiery mo zapyndy dyktatorske. To je kaplica.

Nie dej Bog, żeby do tego swoji 3 grosze dociepły Chinole, bo wtedy momy praktycznie 3 wojna  światowo. A tego przeca żodyn nie chce.

Nom zwykłym, szarym Lukom zostało żykać i prosić o pokoj, bo yno tela mogymy.

A na koniec życza wom udanego tydnia. Pyrsk!

Harynek – śledź

Co rusz – jak zwykle

Żykać – modlić się

Czakej – czekać