Nowoczesno oma

Oma piyrwej kojarzyła sie nom z takom babinkom bez zymbow, we chustce na gowie i różańcym we rynkach. Miała pomarszczone czoło i rozprowiała o utopkach.

Jako dzisio wyglondo współczesno Oma?

Chyba blank inakszy. Dzisiejsze omy, przede wszyskim nie wyglądajom na omy. Majom tipsy, gładki lico i wyfrizurowane gowy. Do tego som nowoczesne i poradzom klikać we Internecie.

Czy to je dobrze czy źle? Jo myśla, że dobrze. Przeca momy XXI wiek. Dzisiejsze omy przede wszyskim inakszy funkcjonujom. Chodzom na muzyki, uniwersytety III wieku i som do przodku ze wszyskim.

Ale to dobrze, bo przeca mogom uczyć swoji wnuki wszyskigo co dzisio poczebne do życio.

A co je poczebne? Jo myśla, że cza sie umieć znojś w dzisiejszych czasach. Czyli cza być, jak to sie terozki godo trendi.

Ale omy majom też inksze zadania. Przede wszyskim muszom bajtle uczyć tego co erbły od swojich starek. Systymu wartości, śląskigo poczucio obowiązku i robotności.

Nasze omy som po to, żeby też nos rozpieszczać, beztoż momy okazjo im podziynkować, chocioż roz do roku. Nie zapomnijcie o dniu Babcie i Dziadka. Kupcie kwiotek, szykulada i ciście powinszować skiż świynta. Pyrsk!

Lico – policzek

Poradzom – potrafią

Erbły – otrzymały