Odchudzomy Ślońsk

Tak se myśla Roztomili Ludkowie, że kożdy z nos je takim jakim go Pon Boczek stworzoł. Jedyn je łysy, drugi kudłaty, czeci chudy, a sztworty przi kości (żeby nie pedzieć bachraty).

Nojwiyncyj problemu mo człowiek dycki z tom wogom, bo i przeca jeś szmakuje, a nasza kuchnia ślonsko do lekkich nie noleży. Jak tam kiery ciynżko robi, to se i pojeś może konkretnie. Ale dzisio ludzie sie majom lepszy, a nawyki zostały.

Czamu o tym godom? Boch łoto boł we Katowicach, kaj była tako akcjo „Odchudzomy Ślońsk”. Ale tak po prowdzie nojbardzij szło o bajtle. Przeca tela ich tera je grubiutkich. A wszysko skuli tego, że za mało tyrajom, a yno siedzom przed zżyroczym czasu- komputerym. Jo wiym, że czasu i czasow nie cofnymy, ale cza sie tym zainteresować, żeby my nie byli jak te Amerykony- kożdy po 300 kilo.

W tej akcji szło o to, że jak bajtel przinios batona, abo cosik słodkigo (szykulada, czy inszy maszket) dostowoł za to jabka, apluzyny, czy furzichy. Podle mie superowy pomysł.

Jak mie zadzwoniyli, czy sie na to pisza, zaroz ech padoł ja.

Jo zaś mioł za zadani uważić cosik ślońskigo w wersji light (tera tak sie to szumnie nazywo). Czy idzie ważić śloński kust w takij wersji? A jo wom powiym, że jasne, że ja. Przeca bioły żur może być na wodzie, bez szpyrek (taki biydniejszy, co nie znaczy niedobry), karminadle mogom być ważone, a zamias bratkartofli proponuja pogańskie krupy. I już je wersja light. Powiym wom yno tela. Stare ślońskie przepisy wcale, a wcale nie som takie masne. A bardzi pożywne i zdrowe.

Mie sie dycki zdo, że nie woga je nojważniejszo, ale to czy jodło kiere jymy je pożywne i zdrowe. Bo jak kiedyś kieryś padoł- „Je żeś tym co jysz”. Beztoż jydzcie zdrowo i dbejcie o to co jedzom bajtle. Bo przeca to łoni bydom tworzyć nowe pokolyni, kiere mo robić na nasze pyndzyje. Pyrsk!

Pyndzyje – emerytury

Apluzyny – pomarańcze

Fyrzichy – brzoskwinie

Bachraty – gruby

Maszket – coś słodkiego

Pogańskie krupy – kasa gryczana