Golonkowy czas

Ani my sie obejrzeli za sia, a już momy jesień. Na dworze coroz bardzi zima, a my momy szmak na konkretne jodło, po kierym organizm bydzie nos grzoł. A przeca wiadomo, że maśniejsze jodło, dowo nom energio i wspomniano ciepłota. Roztomańte szałoty som dobre bez lato, ale przi takij pogodzie cza ciamać konkret.

Zresztom nasze somsiady – Niymce, już przeca fajrujom na Oktoberfestach. Tam golonek i piwa nie brakuje. Zresztom oni se majom za coś, ta tradycjo biesiadowanio. A kożdy kiery tam przijedzie, musi skosztować golonka po bawarsku, znanego na cołki świat.

U nos golonko nojbardzi idzie na barborka, ale o tym czasie już też szmakuje fest.

A nie wiym czy wiycie, że golonko, to nie yno cholesterol, o kierym sie durch trombi, ale też walory zdrowotne (tak sie to tera piyknie nazywo). Bo przeca golonko mo naturalno żelatyna, beztoż jak jymy, toż nom potym mazidła w kolanach nie brakuje i kolana chocioż nie zgrzipiom.

Baby chyba ło tym nie wiedzom, że w skorze z golonka i pod niom, je kolagyn, o kierym sie teraz durch godo. A on je przeca na zmarszczki, kierych kożdo baba nie chce mieć.

Ale do mie golonko to przede wszyskim dobry szmak. A jeszcze jak je fajnie zapeklowane, to je żileta i mucha niy siodo. Troszka zymfu, chrzanu i jymy. Co tu dużo godać, zrobcie se golonko, abo przidzcie na gotowe do mie. Pyrsk!

Ciamać – jeść

Maśniejsze – tłustsze

Zymft – musztarda

Trombi – głosi

Powiat jest jak firma z kagańcem