Kaj na wywczasy?

Musza wom pedzieć, że mom pieroński problym. Momy koniec moja, a jo durch niy wiym kaj jechać na wywczasy. Terozki sie tela trombi o roztomańtych biurach podróży, co konsek kiereś zbankroci, że człowiek je cały zgupiony co tu robić. Nie chciołbych zostać z taszami na lotnisku, abo pod palymkom. A do tego Ministerstwo Turystyki padało, że jak se kieryś pojedzie, a biuro zbankroci, to nie do ani grosika, żeby ludzi skludzić nazot. I co o tym myśleć?

A jak już człowiek jednak, sie sztelnie te wywczasy, to uzaś niy wiy czy dobrze wybroł. Bo kaj tu jechać? Do Egiptu, żeby mieć bez poł wywczasow drapszajs, do Turcyje, żeby o piątej rano budziły nos ryki tego co woło na żykani do meczetu.

W Chorwacji je piyknie, ale uzaś ni ma piosku i se idzie kolana odżyć jak człowiek liźnie na zol, a ku tymu te pieroński jeżowce. Na Węgrach tyż piyknie, choć bez morza, cożkej dogadać sie z nimi za pierona niy idzie. I kaj tu jechać?

Czy nad polski morze? Przeca Bałtyk momy taki piykny, cudowne plaże. Cożkej pogoda. A ś niom je w Polsce jak z losowaniym Karolinki– trefi abo i niy. Jak trefi, toż je bajka, ale jak cołki tydziyń padze i je 13 stopni– to człowiek yno kupa piyndzy udo, bo chodzi od szynku do szynku i psinco s tego mo.

Powiym wom, że je żech zgupiony i nie wiym co byda robioł. Dondzie do tego, że byda mioł wczasy pod gruszom– deka, niweja, radijok i swoja zegrodka, kaj przeca je tyż piyknie. Jak zgłodnieja, to utargom se tomata, ku tymu jaki szałot, zupa z oberiby i objada rychtyk łacno te wywczasy. Jak byda sie chcioł potoplać, to se naplompia basyn i wskocza na ynta. Tak chyba zrobia jak nic mądrego do lipnia nie wymyśla. Pyrsk!

Zbankroci – zbankrutuje

Deka – koc

Oberiba – kalarepa

Szynk – bar

Tomata – pomidor

Skludzić – sprowadzić