Ślońskie odpusty

Odpust na Slońsku, moga pedzieć to był praje nojważniejszy dziyń w roku każdego Hanysa, ale i cołkij familije. Sjyżdżała sie cołko czelotka, kaj jako ciotka, ujce, bajtle. Boł też to czas fajrowanio, ale i takich małych podsumowań– kiero uzaś je w ciąży i z kierym już bajtlym, kiery schrub i wiela. A jak już wto schud– to na pewno musioł być jaki chory.

Boł też to czas dobrego jodła– bo przeca odpust sie zaczynało od sumy, potym łobiod (rolady, kaczki, kroliki, modro kapusta, no i 2 zorty klusek z zołzom), szpajzy, kopy, no i kołocz. Musiała też być dycki odpustowo gorzołka, a do obiadu piwo.

Nie było też odpustu bez szisbudow, no i karasola. A wiela małżeństw sie sporzyło przi odpustach!

Wiela zostało do dziś z tych prawdziwych odpustow?

Karasol lecy kiedy nadjyżdżo, szisbudy jak som to je szczynści, yno jeszcze budy i bombony dycki som. Jo se odpustu bez zimioka abo futermeloka nie wyobrażom.

Familijo sie jeszcze sjyżdżo, ale już troszka w okrotym składzie, bo dzisio kożdy przeliczo wiela to kosztuje.

Została rolada na łobiod, kołocz ku kawie, no i kożdy sporząto na zicher w chałupie i kole ni.

Bajtle majom uciecha, bo iś ku budom to je coś. Przeca cza mieć balon, dziołszki pieszczonek, a synki pacpatrony.

Yno co to za dziwota, jak wszysko je w sklepie, kożdo graczka z odpustu. Kiedyś to było coś, mieć cosik z odpustu. Jo nikiedy i 4 razy lecioł ku budom.

Ale tak se myśla, że chocioż tela dobrze, że jeszcze chcymy fajrować te odpusty i do kupy spotykać sie z cołkom familijom, bo to chyba w tych podziczałych czasach je najważniejsze. Pyrsk!

Czelotka – grupka

Zołza – sos

Szpajza – krem z jajek

Karasol – karuzela

Zicher – bardzo dokładnie

Graczka – zabawka