Dziyń Kobiyt

I ani my sie łobejżeli a już momy przeca marzec. A jak poczontki marca, toż oczywiście Dziyń Kobiyt. A musza wom pedzieć, żech tak łoto se doł pozor, że świynto te przechodzi prawdziwy renesans. Tak jak do mody na nowo trefiyły goździki.

Jeszcze dwajścia pora lot tymu, dlo kobiyt, bo nie chca używać słowa bab, to boło przeca nojważniejsze wydarzyni w roku.

Po tym boł czas, że jakoś to wszysko przigasło. Ale uzaś widza, że 8-mego marca, to je prawdziwy fajer. Babski combry, kaj się rychtyk dużo dzieje!

Nikiedy jak tak mom czas podumać, to se myśla, że przeszli my prawdziwo rewolucjo społeczno. Kaj to kiery widzioł jeszcze 30  lot tymu, żeby baby same siedziały w szynku przi piwie. To yno przeca uchodziyło chopom. A dzisio nic już żodnego nie dziwi.

Wszysko je przewrocone do gory nogami- chopy sie seblykajom przed babami, a kobiytki im jeszcze za to płacom.  Chopy bawiom dzieci na tacierzyńskim, myjom okna i robiom inksze babski roboty. Czasu już nie cofnymy, świata tyż. A zresztom po co? Przeca tak tyż je dobrze.

Dobrze, że natury nie łocyganiymy, bo by my jeszcze bajtle rodziyli. Chocioż czy jo wiym, czy za 200 lot nie wymyślom czego, żeby to zmienić.

A tak na teraz, winszuja wom kochane kobiytki dużo zdrowio, radości, pociechy z nas- chopow i nie bydzcie zmierzłe. Pyrsk!

Słowniczek dlo bajtli:

Dumać – myśleć

Seblykać – rozbierać

Cyganić – oszukiwać